Ս/թ նոյեմբերի 16-ին Հայկական ԱԷԿ-ում կայացավ պաշտոնական հանդիպում՝ նվիրված 2016 թվականից ՀԱԷԿ-ում ընթացող թիվ 2 էներգաբլոկի շահագործման ժամկետի երկարացման ծրագրի ավարտական փուլի արդյունքների ամփոփմանը։
Հանդիպմանը ներկա էին ՀՀ Տարածքային կառավարման և ենթակառուցվածքների նախարար Գնել Սանոսյանը, ՀՀ-ում ՌԴ արտակարգ և լիազոր դեսպան Սերգեյ Կոպիռկինը, "Ռոսատոմ" պետկորպորացիայի գլխավոր տնօրեն Ալեքսեյ Լիխաչյովը, նրանց ղեկավարած պատվիրակությունը և ԶԼՄ տարբեր ներկայացուցիչներ: Որպես ռուսական կողմից ՇԺԵ ծրագրի իրականացման լիազորված կազմակերպություն՝ АО "Русатом Сервис"-ը կազմակերպել էր մի շարք աշխատանքային և հանդիսավոր միջոցառումներ։
Բարձրաստիճան հյուրերը նախ շրջայց կատարեցին ատոմակայանի տարածքում. Տուրբինային արտադրամասի մեքենասրահում ծանոթացան էլեկտրաէներգիայի արտադրության տեխնոլոգիական շղթայում ներառված հիմնանորոգված ու արդիականացված հիմնական և օժանդակ համակարգերին ու սարքավորումներին։ Այնուհետև տեղում ծանոթացան բլոկի կառավարման վահանակի, տեղեկատվական-հաշվողական, ինչպես նաև կայանի անվտանգ շահագործման համար պատասխանատու այլ համակարգերի արդիականացման ուղղությամբ իրականացված աշխատանքներին։ Կատարված աշխատանքների վերաբերյալ շրջայցի ընթացքում ամփոփ տեղեկատվություն ներկայացրին «ՀԱԷԿ» ՓԲԸ գլխավոր տնօրեն Է. Մարտիրոսյանը և АО "Русатом Сервис" ընկերության տնօրեն Եվգենի Սալկովը:
Այցի շրջանակում, ի նշան արդյունավետ համագործակցության, ՀԱԷԿ-ի տարածքում հիմնվեց խորհրդանշական ծառուղի, որտեղ բարձրաստիճան ղեկավար անձինք անվանական ծառեր տնկեցին՝ կարևորելով «կանաչ էներգետիկա» բնապահպանական նախագծի իրականացումը:
Հաջորդիվ կայացած պարգևատրման արարողության ընթացքում էներգետիկ ոլորտում, ինչպես նաև ՀԱԷԿ-ի անվտանգ և հուսալի շահագործման գործում ունեցած զգալի ներդրման համար պարգևատրվեցին թե՛ բարձրաստիճան պաշտոնյաներ, թե՛ ՀԱԷԿ-ի և կապալառու ռուսական ընկերությունների մի շարք մասնագետներ:
Պաշտոնական արարողության ավարտին կայացավ կարճատև ասուլիս, որի ընթացքում ՀՀ ՏԿԵ նախարար Գ. Սանոսյանը և «Ռոսատոմ» ՊԿ գլխավոր տնօրեն Ա. Լիխաչյովը պատասխանեցին ԶԼՄ ներկայացուցիչների հարցերին: