«Ինչպես ընդգծել է քարտուղարը, մենք հավատարիմ ենք Հայաստանի և Ադրբեջանի խաղաղ բանակցություններին։ Մենք երկու ղեկավարներին էլ խրախուսել ենք հանդիպել այն ձևաչափով, որն առավել օգտակար է նրանց համար: Մենք կարծում ենք, որ ուղիղ երկխոսությունը առանցքային է խնդիրների լուծման և կայուն խաղաղության հասնելու համար: Ահա թե ինչու պետքարտուղար Բլինկենը սեպտեմբերին Նյու Յորքում հավաքեց Հայաստանի և Ադրբեջանի ԱԳ նախարարներին, երբ նրանք առաջին անգամ միևնույն սենյակում էին վերջին լարումից հետո: Ի վերջո, Հայաստանն ու Ադրբեջանն են որոշում՝ Պուտինի հրավերն օգտակար կլինի՞ նրանց համար՝ ձգտելու կայուն խաղաղությանը:
2008 թվականին Ռուսաստանի ներխուժումը Վրաստան և նրա շարունակական դաժան ներխուժումը Ուկրաինա ցույց են տալիս, որ Մոսկվան քիչ է հարգում իր հարևանների ինքնիշխանությունը և դժվար թե հուսալի, երկարաժամկետ գործընկեր լինի: Բայց, ի վերջո, սա կլինի մի որոշում, որը պետք է կայացնեն Հայաստանն ու Ադրբեջանը։
Հարավային Կովկասի երկրների ինքնիշխանությանն ու անկախությանը, ի վերջո, ԱՄՆ-ից ավելի շատ աջակցող չկա։ 1991-ին ՍՍՀՄ-ից Հայաստանի, Ադրբեջանի և Վրաստանի անկախանալը կարևոր իրադարձություն էր, որը երաշխավորեց այս երկրներից յուրաքանչյուրի իրավունքը՝ անկախ Մոսկվայից կամ որևէ այլ երկրից՝ իր արտաքին քաղաքական շահերը հետապնդելու»։ Այդ մասին հայտարարել է ԱՄՆ պետդեպ խոսնակ Նեդ Փրայսը ամենօրյա ճեպազրույցի ժամանակ։