Հայաստանյայց Առաքելական Սուրբ Եկեղեցին նոյեմբերի 28-ին տոնախմբում է Հայաստանում քրիստոնեությունը տարածած առաջին առաքյալների՝ Թադեոսի եւ Բարդուղիմեոսի տոնը: Թադեոս առաքյալը Հիսուս Քրիստոսի 12 աշակերտներից է: Նա քարոզել է Պաղեստինում, Արաբիայում, Սիրիայում, ինչպես նաեւ Միջագետքում եւ Հայաստանում: Հայաստանում նա չարչարանքի է ենթարկվում, գամվում խաչին եւ նետահարվում: Երեք դար անց առաքյալի գերեզմանի վայրում Թադեի վանքն է կառուցվում: Սուրբ Թադեոսի մասունքները պահվում են Էջմիածնի տաճարում, որտեղ այդ օրը պատարագ է մատուցվում, իսկ հավատացյալները խոնարհվում են առաքյալի սուրբ մասունքներին: Սուրբ Բարդուղիմեոսը քրիստոնեական առասպելներում հայտնի է որպես 12 առաքյալներից մեկը: Նա քարոզել է Սիրիայում եւ Փոքր Ասիայում, այնուհետեւ ուղեւորվել Հայաստան՝ իր հետ բերելով Աստվածամոր ձեռագործ պատկերն ու նրան նվիրված եկեղեցի կառուցել:
Առաքյալների տոնին Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի օրհնությամբ Մայր Աթոռի Սուրբ Հովհաննես Մկրտիչ և Սուրբ Վարդան մատուռ-մկրտարանում կմատուցվի Ս. Պատարագ: Այս առիթով դուրս կբերվի և Ս. Պատարագի ընթացքում տաճարում կմնա Սուրբ Էջմիածնում պահվող Աստվածամուխ Սուրբ Գեղարդը: Վերջում Ամենայն Հայոց Կաթողիկոսը հրաշագործ Սուրբ Գեղարդով կօրհնի ներկա բարեպաշտ ժողովրդին և հայրենի մեր երկիրը:
Հիշեցնենք, որ Առաքյալների տոնը Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի սրբատառ կոնդակով դեռևս 2015 թվականին հռչակվել է Աստվածամուխ Սուրբ Գեղարդի ուխտի օր:
