Այսօր՝ Պոեզիայի համաշխարհային օրը, Հայաստանում կնշվի յուրօրինակ միջոցառմամբ
Ժամը 19:00-ին Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնի պատշգամբներից ժամանակակից գրողներ Հուսիկ Արան, Մհեր Արշակյանը, Արմեն Սարգսյանը, Թոնդրակը, Գեւորգ Գիլանցը, Լուսինե Եղյանը եւ այլք հանրության համար կընթերցեն իրենց ստեղծագործությունները: Այն հնարավոր կլինի դիտել Ազատության հրապարակից։
Տեղեկությունը «Հայկական ժամանակ»-ին փոխանցեց միջոցառման կազմակերպիչ Ռոզա Գրիգորյանը: «Յուրաքանչյուր գրող բարձրախոսով լինելու է Օպերային պատշգամբներից մեկում, մոտավորապես 10-15 րոպե հենց իր ստեղծագործություններն է կարդալու»,- ասաց նա:
Գրիգորյանի խոսքով՝ միջոցառման նպատակն է է՛լ ավելի նպաստել պոեզիայի հանրահռչակմանն ու դրա նկատմամբ առավել մեծ հետաքրքրության առաջացմանը։
Նշենք, որ ամեն տարի՝ մարտի 21-ին, աշխարհում նշվում է Պոեզիայի համաշխարհային օրը։ Այս տոնը 1999 թվականին հռչակել Է ՅՈՒՆԵՍԿՕ-ն։ Ինչպես նշվել է ՅՈՒՆԵՍԿՕ-ի որոշման մեջ, տոնի ստեղծման նպատակն է «նոր լիցք եւ ճանաչում հաղորդել ազգային, տարածաշրջանային եւ միջազգային բանաստեղծական շարժումներին»:
Միջոցառման նախաձեռնողներ են «Անտարես» հրատարակչությունը եւ Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնը: