Արցախի Հանրապետության պետական նախարար Արտակ Բեգլարյանը հուլիսի 6-ին Երևանում մասնակցել է «Ապագա Հայկականը» նախաձեռնության երկրորդ համաժողովին, որտեղ քննարկվել են Արցախի և Հայաստանի կայուն զարգացման հեռանկարները:
Պետական նախարարը բարձր է գնահատել Արցախի կառավարության և նախաձեռնության միջև առկա համագործակցությունը, ողջունել առաջին համաժողովն Արցախում կազմակերպելու փաստը, որը և՛ խորհրդանշական, և՛ կիրառական կարևոր նշանակություն ուներ:
«Արցախյան համաժողովն արդյունավետ էր ձևաչափի ու մեթոդաբանության տեսանկյուններից, քանի որ ներառականության սկզբունքի հիման վրա հասարակության տարբեր խմբերի ներկայացուցիչներ հնարավորություն ունեին ազատորեն իրենց կարծիքը արտահայտել իրավիճակի և ապագա լուծումների վերաբերյալ: Կարևոր էր նաև թեմայի ընտրությունը, որովհետև Արցախի երկարաժամկետ զարգացման համար կարևորագույն հենասյուներից մեկը ժողովրդագրությունն է, և այդ ուղղությամբ ևս համազգային համախմբման կարիք կա»,- նշել է Արտակ Բեգլարյանը:
Պետական նախարարը շեշտադրել է, որ Հայաստանի և ամբողջ հայության համար Արցախը բացառիկ նշանակություն ունի, և «Ապագա հայկականը» նախաձեռնությունը կարող է լինել արդյունավետ հարթակներից մեկը Արցախի անվտանգային, ժողովրդագրական, տնտեսական, կրթական և այլ ուղղություններով երկարաժամկետ զարգացման նպատակով հայկական ներուժի համախմբման համար:
