Զրուցակիցներն անդրադարձել են Ադրբեջանի կողմից Լաչինի միջանցքի ապօրինի արգելափակման հետևանքով շարունակվող ճգնաժամային իրավիճակին։ Մտքեր են փոխանակվել Հայաստան-Ադրբեջան հարաբերությունների կարգավորման գործընթացի, խաղաղության պայմանագրի, տարածաշրջանի հաղորդուղիների վերագործարկման հարցերի շուրջ։
Վարչապետը մտահոգություն է հայտնել վերջին շրջանում Ադրբեջանի աճող ագրեսիվ հռետորաբանության և սադրիչ գործելակերպի առնչությամբ, ինչը խոչընդոտում է կայունությանն ու խաղաղությանը միտված ջանքերին։
Եվրոպական խորհրդի նախագահը վերահաստատել է ԵՄ պատրաստակամությունը՝ նպաստելու տարածաշրջանում երկխոսությանն ու խաղաղությանը։
Նիկոլ Փաշինյանի հետ հեռախոսազրույցից հետո Շառլ Միշելը խոսել է նաև Իլհամ Ալիևի հետ:
Եվրոպական խորհրդի ղեկավարն անդրադարձել է Լաչինի ճանապարհի շուրջ ստեղծված իրավիճակին և մտահոգություն հայտնել հայ-ադրբեջանական սահմանին տեղի ունեցած միջադեպերի առնչությամբ։
Ռուսաստանի և Թուրքիայի նախագահներ Վլադիմիր Պուտինը և Ռեջեփ Թայիփ Էրդողանը հեռախոսազրույց են ունեցել, քննարկել են իրավիճակն Ուկրաինայում ու երկկողմ հարաբերությունները՝ հայտնել են Թուրքիայի ղեկավարի գրասենյակից:
Էրդողանը շնորհակալություն է հայտնել Պուտինին հացահատիկի գործարքի երկարաձգման հարցում դրական դիրքորոշման համար: Նրա խոսքով՝ Թուրքիան մեծապես կարևորում է Ռուսաստանի և Ուկրաինայի միջև բանակցությունների միջոցով հակամարտության շուտափույթ ավարտը:
Թուրքիայի նախագահը հայտարարել է, որ Անկարան և Մոսկվան կարող են տնտեսական համագործակցության ուղղությամբ նոր քայլեր ձեռնարկել Սոչիում ձեռք բերված համաձայնությունների հիման վրա:
Կրեմլից էլ հայտնել են, որ պայմանավորվածություն է ձեռք բերվել մշակել ՌԴ-ից շինանյութերի մատակարարումների կարգավորման հնարավորությունները՝ Թուրքիայում երկրաշարժի հետևանքով քանդված ենթակառուցվածքների և շինությունների վերականգնման համար:
Ընդգծվել է նաև թուրք-սիրիական հարաբերությունների կարգավորման գործընթացի շարունակման կարևորությունը։
