Ուկրաինայում ՀՀ դեսպանությունը ամբողջ կազմով շարունակում է բնականոն գործունեությունը: Այս օրերին ուշադրության կենտրոնում են մեր քաղաքացիներին ցուցաբերվող օժանդակությանը վերաբերող հարցերը՝ հայտնում են դեսպանությունից:
«Օդեսայում Գլխավոր հյուպատոսությունը, Լվովում և Ուժգորոդում նորաբաց ՀՀ ժամանակավոր հյուպատոսություններն ամենօրյա ռեժիմով ընդունում են քաղաքացիներին, որոնցից շատերը ռազմական գործողությունների ժամանակ կորցրել են իրենց փաստաթղթերը և դեպի հայրենիք վերադարձի վկայականի տրամադրման կարիք ունեն։ Տրամադրվում են նաև այլ հյուպատոսական ծառայություններ։
Դեսպանությունը բազմաթիվ հեռախոսազանգեր է շարունակում ստանալ։ Առաջին օրերին դեսպանության դիվանագետները 24-ժամյա ռեժիմով օրական ստացել են 1000-ից ավելի զանգ, այժմ դրանց թիվը հասնում է միջինը 300-ի։
Նշված աշխատանքին զուգահեռ, դեսպանությունը ողջ ծավալով իրականացնում է այլ գործառույթներ՝ լիարժեք կերպով մշտական կապ պահպանելով ինչպես հայկական, այնպես էլ ուկրաինական գերատեսչությունների հետ»,- ասված է դեսպանության Ֆեյսբուքի գրառման մեջ:
Դոնի Ռոստովում ՀՀ գլխավոր հյուպատոսությունը, Ուկրաինայում ստեղծված իրավիճակով պայմանավորված, շուրջօրյա ռեժիմով կապի մեջ է աջակցության կարիք ունեցող ՀՀ քաղաքացիների հետ․ թեժ գծին և գլխավոր հյուպատոսության հեռախոսահամարին ստացվում են հարյուրավոր հեռախոսազանգեր:
Գլխավոր հյուպատոսություն դիմած քաղաքացիներին ցուցաբերվում է համակողմանի աջակցություն. մասնավորապես՝ քաղաքացիների անձը հաստատող փաստաթղթերի հետ կապված, ինչպես նաև տրամադրվում է հյուպատոսական, տեղեկատվական և այլ բնույթի աջակցություն։