«Թուֆենկյան» բարեգործական հիմնադրամը տարիներ շարունակ աջակցել է Քաշաթաղի շրջանի վերաբնակեցմանը և կայացմանը՝ իրագործելով տարբեր ծրագրեր. դպրոցաշինություն, բնակարանաշինություն, գյուղատնտեսություն և այլն:
Այս մասին «Արցախպրես»-ի թղթակցի հետ զրույցում ասել է Քաշաթաղի շրջվարչակազմի ղեկավարի օգնական Իննա Բաբայանը: Նրա խոսքով՝ 2020 թ-ի առաջին կիսամյակի ընթացքում բարեգործական հիմնադրամը Քաշաթաղում արդեն կատարել է մի շարք աշխատանքներ՝ առաջնային համարելով գյուղատնտեսության զարգացումը:
«Տարվա սկզբից հիմնադրամն իրականացնում է նոր գյուղատնտեսական ծրագիր Միջնավանի տարածքում՝ հիմնելով 5 հեկտար փորձարարական այգի, որտեղ տնկել են տարբեր տեսակի պտղատու ծառեր: Նպատակը՝ ուսումնասիրել, թե որ ծառերն են ավելի հարմար տեղի բնակլիմայական պայմանների համար: Այս տարի, կապված նոր կորոնավիրուսի տարածման հետ, հիմնադրամը Քաշաթաղի հողօգտագործողներին տրամադրել է 64.8 տ. ազոտական պարարտանյութ: Հիմնադրամը շրջանային բուժմիավորմանն է տրամադրել նաև բժշկական տարբեր պարագաներ՝ Աղավնոյի անցակետում հերթապահության ժամանակ օգտագործելու նպատակով:
