2021թ. հուլիսի 22-ին տեղի ունեցավ Եվրոպական միության և Եվրոպայի խորհրդի կողմից՝ Գործընկերություն հանուն լավ կառավարման (ԳԼԿ II) ծրագրային ձևաչափի շրջանակներում ֆինանսավորվող և Եվրոպայի խորհրդի կողմից իրականացվող «Աջակցություն դատական բարեփոխումների իրականացմանը` Հայաստանում դատական իշխանության անկախության և արհեստավարժության ամրապնդումը» ծրագրի կողմից կազմակերպված՝ Առաջնորդության առցանց դասընթացը կին դատավորների համար:
Ծրագրի բաղադրիչներից մեկն ուղղված է կին դատավորների հզորացմանը` զարգացնելով նրանց առաջնորդության հմտությունները: Այդ նպատակով 2020 թվականի սեպտեմբերին Ծրագրի կողմից կազմակերպվեց մեկօրյա դասընթաց Հայաստանի 25 կին դատավորի համար առաջնորդության հմտությունների բարելավման թեմայով:
Ի շարունակություն առաջին դասընթացի՝ Ծրագիրը կազմակերպեց առաջնորդության հմտությունների բարելավմանն ուղղված երկրորդ դասընթացը Հայաստանի կին դատավորների այլ խմբի համար:Դասընթացը վարեց Հյուսիսային Մակեդոնիայի Փաստաբանների Ասոցիացիայի կառավարման խորհրդի անդամ և փոխնախագահ Ելենա Ռիստիչը, ով վարել է նաև առաջին դասընթացը:
Դասընթացի ընթացքում քննարկվել են կանանց դերի կարևորությունը դատական իշխանությունում, առաջնորդության առանձնահատկությունները և առաջնորդության տեսակները, առաջնորդության հմտությունների զարգացումը, կին դատավորների կարիերայի զարգացման խոչընդոտները և դրանց հաղթահարման ուղիները:
Առցանց քննարկմանը ներկա էին Երևան քաղաքի, Լոռու, Արարատի և Գեղարքունիքի մարզի առաջին ատյանի դատարանների, ինչպես նաև Սնանկության դատարանի կին դատավորները:
