ՌԴ Դաշնային խորհրդի փոխխոսնակ Յուրի Վորոբյովը հայտնել է, որ Հայաստանում դադարեցվել է Ռուսաստանի կողմից փոխանցված ռուսերեն դասագրքերի բաշխումը դպրոցներին։
«ՀՀ Ազգային ժողովի նախաձեռնությամբ և հայ-ռուսական միջխորհրդարանական հանձնաժողովի նիստերում հայ պատգամավորների բազմաթիվ դիմումների արդյունքում, Դաշնության խորհրդի ղեկավարության անմիջական աջակցությամբ, ռուսական կողմին հաջողվել էր լրացուցիչ բյուջետային միջոցներ հայթայթել՝ Հայաստանի դպրոցներին ռուսերեն ուսուցման ավելի քան 50 հազար դասագիրք ձեռք բերելու և անհատույց տրամադրելու համար»,- գրել է նա Տելեգրամի իր ալիքում։
Վորոբյովը մանրամասնել է, որ ինքը մեծ տարակուսանքով է տեղեկացել այն մասին, որ ՀՀ ԿԳՄՍ նախարարությունը դադարեցրել է դասագրքերի տրամադրման գործընթացը՝ ուսումնական նյութերի փորձաքննություն իրականացնելու անհրաժեշտության պատրվակով։
«Հատկապես տարօրինակ է թվում այն փաստը, որ հայ գործընկերները անձամբ են մեզ անհրաժեշտ դասագրքերի կոնկրետ ցանկ ուղարկել։ Շատ ցավալի է, որ նման անհեռատես քաղաքական ինտրիգներից առաջին հերթին տուժում են եղբայրական հայ ժողովրդի երեխաները՝ փոքրիկ տղաներն ու աղջիկները», - գրել է Վորոբյովը։
Նա հավելել է, որ ՌԴ պատվիրակությունն այդ հարցը Բիշքեկում բարձրացրել է ՀՀ ԱԺ փոխխոսնակի մոտ։
«Հուսով ենք՝ բոլոր խոչընդոտները առաջիկայում կվերացվեն»,- հավելել է Վորոբյովը։
«Չի արգելվել որևէ դասագրքի մուտք դպրոցներ, ընդամենը այդ դասագրքերը ներկայացվել են փորձաքննության, ինչը ՀՀ հանրակրթության մասին օրենքի պահանջ է»,- ասացին ԿԳՄՍ նախարարությունից՝ մեկնաբանելով ՌԴ Դաշնային խորհրդի փոխխոսնակ Յուրի Վորոբյովի հայտարարությունը, ըստ որի Հայաստանի ԿԳՄՍՆ-ն կասեցրել է Ռուսաստանի կողմից նվիրաբերված ռուսերեն դասագրքերի բաշխումը դպրոցներին:
Նախարարությունից նշեցին, որ «Հանրակրթության մասին» օրենքով ցանկացած նյութ, դասագիրք, մեթոդական ձեռնարկ, կամայական ուսումնական նյութ, որը մտցվում է դպրոց, ենթարկվում է փորձաքննության՝ դրա համապատասխանությունը Հայաստանի կրթական չափորոշիչներին մասնագիտորեն հիմնավորելու նպատակով: Դա արվել է նաև այս պարագայում, և շատ արագ այդ դասագրքերը, որոնք ուղարկվել են ռուսական կողմից և նախատեսված են Հայաստանում գործող ռուսերենով ուսուցմամբ դասարանների համար, սահմանված կարգով կանցնեն փորձաքննություն եւ կտրվեն դպրոցներին:
Փորձաքննությունն իրականացնում է «Կրթության զարգացման և նորարարության ազգային կենտրոն» հիմնադրամը:
ԿԳՄՍՆ-ից հայտնեցին նաև, որ ռուսերենով դասագրքերը փորձաքննության ուղարկելը հատկապես հիմա կարևոր է, քանի որ Հայաստանում ներդրվել է հանրակրթության նոր չափորոշիչը:
«Այս դեպքում մենք խոսում ենք ռուսական կողմից ուղարկված ոչ թե ռուսերենի դասագրքերի, այլ մյուս առարկների դասագրքերի մասին: Մենք ունենք ռուսերենով ուսուցմամբ դասարաններ, որտեղ ռուսերենով իրականացվում է, օրինակ, մաթեմատիկայի, կենսաբանության և այլ առարկաների ուսուցումը:
ՀՀ-ում կրթություն ստացող երեխան, անկախ նրանից, թե ինչ լեզվով է կրթություն ստանում, կրթական նույն արդյունքը պետք է ունենա: Խոսքը սրա մասին է: Հնարավոր չի թույլ տալ, որ հայկական դասարանում կրթական այլ վերջնարդյունք կամ այլ բովանդակություն լինի, ռուսերենով ուսուցմամբ դասարանում՝ այլ: Միևնույն է, դրանք բոլորը պետք է նույն ծրագրի շրջանակում լինեն: Այդ նպատակով է փորձաքննությունը արվում»,-ասացին նախարարությունից:
