Shamshyan.com-ի տեղեկություններով՝ նոյեմբերի 24-ին արտակարգ դեպք է տեղի ունեցել Երևանում:
Ժամը 12:30-ի սահմաններում ՀՀ արդարադատության նախարարության դատական ակտերի հարկադիր կատարման աշխատակիցներից Զոհրաբ Մ.-ն ահազանգել է ՀՀ ՆԳՆ ոստիկանության Մաշտոցի բաժին և հայտնել, որ մի քաղաքացի մտել է Հալաբյան փողոցում գործող ԴԱՀԿ շենք և սպառնացել ինքնասպանություն գործել:
Կայքի փոխանցմամբ՝ դեպքի վայր են ժամանել ոստիկանները, քննիչներ, փրկարարական խումբ, հոգեբան:
Պարզվել է, որ Երևանի բնակիչ 48-ամյա Ա. Դ.-ն մտել է ԴԱՀԿ շենք, իր վրա բենզին լցրել ու պահանջել, որ եթե ԴԱՀԿ աշխատակիցները իր հարցերին լուծում չտան, ապա ինքն իրեն կհրկիզի: Տևական ժամանակ ԴԱՀԿ աշխատակիցները նրա հետ բանակցություններ են վարել, և նա հրաժարվել է այդ քայլին դիմելուց:
Դեպքի փաստով փաստաթղթեր են ձևակերպվել և փոխանցվել քննչական բաժին:
Կայքի տեղեկություններով՝ Ա. Դ.-ն հայտնել է, որ ինքը աշխատում է «Երևանի սիթի» ընկերությունում:
Տարածված հրապարակման առնչությամբ ԴԱՀԿ-ից պարզաբանում են հրապարակել:
Կառույցից տեղեկացրել են, որ հարկադիր կատարումն ապահովող ծառայության վարչական շենքի մոտ ուրբաթ օրը՝ նոյեմբերի 24-ին, քաղաքացին սպառնացել է ինքնահրկիզման փորձ կատարել։
«Քաղաքացու խնդիրը հասկանալու համար Ծառայության համապատասխան աշխատակիցներն ընդունել են նրան։ Վերջինիս պարզաբանվել է, որ անշարժ գույքի իր բաժնեմասի նկատմամբ արգելանք է կիրառվել իր, այլ ոչ թե նախկին կնոջ ունեցած պարտավորությունների համար։ Քաղաքացուն տեղեկացվել է նաև, որ արգելանք կիրառված չէ իր աշխատավարձի նկատմամբ։
Պարզաբանումներն ստանալուց հետո առանց միջադեպի քաղաքացին հեռացել է»,- ասված է հաղորդագրության մեջ։
Քննչական կոմիտեից էլ տեղեկացրել են, որ կատարվածի մասին ահազանգի հիման վրա ստուգողական գործողություններ են իրականացվել:
«Պարզվել է, որ անձը, որևէ հանգամանքով պայմանավորված, ինքնահրկիզման նպատակ չի ունեցել, այլ հետապնդել է ԴԱՀԿ աշխատակիցների ուշադրությունը իր խնդրի վրա հրավիրելու նպատակ։ Այդ պատճառով քրեական վարույթ դեպքի առթիվ չի նախաձեռնվել»,- հայտնել են կառույցից:
