Հյուսիսատլանտյան դաշինքի մասնակիցները 100 միլիարդ եվրոյի ռազմական օգնություն են տրամադրել Ուկրաինային Ռուսաստանի դեմ հակամարտությունում և մտադիր են Կիևին աջակցել նաև հետագայում, քանի որ կարծում են, որ այդ մոտեցումը համապատասխանում է իրենց հավաքական անվտանգության շահերին:
Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը Index հունգարական պարբերականին տված հարցազրույցում։
Լրագրողի խնդրանքով մեկնաբանելով այն հաղորդումները, թե Եվրամիության որոշ քաղաքական գործիչներ ցուցաբերում են «հոգնածություն Ուկրաինայից», Ստոլտենբերգն ասել է. «ՆԱՏՕ-ի դաշնակիցները պարտավորվել են աջակցել Ուկրաինային այնքան ժամանակ, որքան անհրաժեշտ է, քանի որ դա բխում է նրանց սեփական անվտանգության շահերից»։
«Ռուսաստանի դեմ պատերազմի սկզբից դաշնակիցներն Ուկրաինային տրամադրել են մոտ 100 միլիարդ եվրոյի չափով ռազմական օգնություն։ Սա ամեն օր մեծ նշանակություն ունի ռազմադաշտում», - հավելել է Ստոլտենբերգը:
Բրյուսելում նոյեմբերի 28-29-ին անցկացվում է ՆԱՏՕ-ի արտգործնախարարների հանդիպում:
