Մուտքի արտոնագրերի ազատականացման ուղղությամբ վերջնական որոշման կայացումը համահունչ կլինի ՀՀ-ԵՄ խորացող համագործակցությանը, հայտարարել է Հայաստանի արտգործնախարարը Եվրոպական հանձնաժողովի փոխնախագահի հետ հանդիպմանը։
Արարատ Միրզոյանը և Մարգարիտիս Սխինասը քննարկել են անվտանգային ոլորտում փոխադարձ հետաքրքրություն ներկայացնող հարցեր։ Ըստ ԱԳՆ-ի՝ նրանք անդրադարձել են տարածաշրջանային կայունության հարցերի ևս։
Միրզոյանը ներկայացրել է տարածաշրջանում երկարատև խաղաղության հաստատման հարցում ՀՀ տեսլականը, ինչպես նաև Արցախից բռնի տեղահանված ավելի քան 100 հազար հայերի կարիքների և իրավունքների հասցեագրմանն կառավարության քայլերը։
Արտգործնախարարը հանդիպել է նաև ԵՄ հարևանության և ընդլայնման հարցերով hանձնակատար Օլիվեր Վարհեիի հետ: Արարատ Միրզոյանը ներկայացրել է «Խաղաղության խաչմերուկ» նախագիծը, որը, ըստ հայկական կողմի, ոչ միայն կարող է տնտեսական առավելություններ տալ տարածաշրջանի երկրներին, այլև դառնալ խաղաղության կարևոր երաշխիք:
Անդրադարձ է կատարվել Հայաստանի և Ադրբեջանի միջև հարաբերությունների կարգավորման ուղղությամբ միջազգային ջանքերին:
Վերջին օրերին եվրոպական մայրաքաղաքում հանդիպում-քննարկումներ անցկացնող հայաստանցի բարձրաստիճան դիվանագետների հայտարարություններում կարմիր թելով անցնում է Եվրամիության հետ հարաբերությունները խորացնելու թեման։
