«Վիվա» բարեգործական կազմակերպության նախաձեռնությամբ և ԱՀ առողջապահության նախարարության աջակցությամբ Մոսկվայից Արցախ ժամանած քիթ-կոկորդ-ականջաբանություն բժշկուհի Աննա Բաբախանյանն արդեն երկու շաբաթ է, ինչ «Արևիկ» մանկական բուժմիավորումում անվճար հետազոտություններ և խորհրդատվություն է իրականացնում։
«Արցախպրես»-ի թղթակցի հետ զրույցում Աննա Բաբախանյանն ասել է, որ ինքն ունի 30 տարվա աշխատանքային փորձ:
Նա բարձր է գնահատել արցախցի բժիշկների ունեցած մասնագիտական գիտելիքները, փորձն ու հմտությունները:
«Յուրաքանչյուր ոլորտի մասնագետ պետք մշտապես զարգացնի իր գիտելիքները, հետևի նորություններին և միշտ ձգտի ունենալ բժշկին վայել կերպար՝ համբերատար , հոգեկան ներաշխարհ հասկացող, բարեհամբույր և անմիջական: Երկու շաբաթների ընթացում ավելի քան 500 երեխայի եմ հետազոտել: Հիմնականում դիմում են ականջի ցավերի դեպքում, լինում են նաև բարդ խնդիրներ, որոնց պատճառները տարբեր են: Նախատեսում ենք բարելավել քիթ-կոկորդի բժշկության կաբինետը. կան անհրաժեշտ սարքավորումներ, բայց ցանկալի կլինի ձեռք բերել նորերը: Վիրահատական միջամտություններն իրականացվում է «Արևիկ» մանկական բուժմիավորման բժշկուհի Քրիստինե Աղաջանյանի կողմից»,-ավելացրել է Ա. Բաբախանյանը:
Նա նշել է, որ Արցախից դուրս ապրող յուրաքանչյուր ոք պատերազմյան օրերին խիստ անհանգստացած էր թե´ արցախցիների և թե´ Արցախի ճակատագրով: Արցախը մենակ չէ, Արցախի հետ են աշխարհի բոլոր հայերը:
Մեր զրուցակիցն իր շնորհակալությունն է հայտնել ԱՀ առողջապահության նախարարությանը, «Արևիկ» մանկական բուժմիավորման բուժաշխատողներին, «Վիվա» բարեգործական կազմակերպության տնօրեն Տատյանա Հովհաննիսյանին, ով Արցախյան երրորդ պատերազմի օրերին, ինչպես նաև խաղաղ պայմաններում կազմակերպել է Մոսկվայի մի շարք բժիշկների այցը Արցախ:
