Կանանց միջազգային օրվա՝ Մարտի 8-ի առթիվ «Հայկական ժամանակ»-ը զրուցել է Ազգային ժողովի «Քաղաքացիական պայմանագիր» խմբակցության պատգամավոր Արուսյակ Մանավազյանի հետ:
- Տիկին Մանավազյան, որքանո՞վ են համատեղելի կինը և քաղաքականությունը՝ հաշվի առնելով կնոջ նուրբ և խոցելի էությունն ու քաղաքական ոլորտին հատուկ հաստատակամությունը:
- Ուրախությամբ պետք է նշեմ, որ մեր օրերում չկա մի ոլորտ, որը կնոջն անհասանելի է կամ անհամատեղելի նրա համար: Եվ դրա համար այսօր կանայք ներգրավված են բոլոր բնագավառներում: Թեև մենք՝ կանայքս, էմոցիոնալ ենք, սակայն միաժամանակ բոլոր բնագավառների ուժն ենք՝ մեզ հատուկ զսպվածությամբ, նպատակասլացությամբ, և, ինչու ոչ, համարձակությամբ:
- Ի՞նչ է փոխում կինն իր ներկայությամբ:
- Մենք մեր էներգիայով, մտքի թռիչքով, նախաձեռնողականությամբ մեծ և կարևոր դեր ենք խաղում ընկերությունների առաջխաղացման գործում և քաղաքական ասպարեզում: Վերջերս Ազգային ժողով մի նախագիծ բերվեց, որը միայն տղամարդ պատգամավորների մասնակցությամբ հնարավոր չէր լինի կյանքի կոչել: Խոսքը «Ընտանիքում բռնության կանխարգելման, բռնության ենթարկված անձանց պաշտպանության և ընտանիքում համերաշխության վերականգնման մասին» օրենքում փոփոխություններ մտցնելու մասին է: Սա համարձակ քայլ էր կանանց կողմից՝ կանանց համար:
- Կնոջ էմոցիոնալությունը կարո՞ղ է խանգարել նրան:
- Բոլորս էլ որոշակի իրավիճակներում էմոցիոնալ դրսևորումներ ունենում ենք, սակայն քաղաքական ոլորտում պետք է զսպել էմոցիաները: Ես վերջին տարիներին սկսել եմ աշխատել էմոցիոնալ ինտելեկտի ուղղությամբ և հասկանում եմ, որ շատ դեպքերում կարողանում եմ դրանք պահել, կամ ավելի ճիշտ չափաբաժնով ու ձևով դրսևորել:
- Թեև Դուք նշեցիք, որ կանայք այսօր ներգրավված են գրեթե բոլոր ոլորտներում, բայց, այնուհանդերձ, նրանց դեռ չեն պատկերացնում բազմաթիվ աշխատանքներ կատարելիս:
- Ես համամիտ չեմ այն ընկալման հետ, որ ասում են, թե կանայք թույլ սեռ են: Օրինակ՝ կարծում եմ՝ Պարեկային ծառայությունում կանանց ներգրավվածությունն է նպաստում, որ այդ ծառայությունը կայանա ու զարգանա: Վերջերս ականատես եմ եղել նաև ռազմարդյունաբերության ոլորտում երիտասարդ աղջիկների, կանանց մասնակցությանը, ինչն ինձ շատ է զարմացրել, միաժամանակ շատ ուրախ եմ տեսնել դա: Նշեմ, որ հանդիպել եմ նույնիսկ կին տաքսու վարորդի, ինչը ողջունելի է: Ձևավորված «կարմիր գծերը», թե կինը այս կամ այն ոլորտում չի կարող աշխատել, կարծում եմ, գնալով փոխվում են:
- Ինչպե՞ս եք համատեղում աշխատանքը և ընտանիքը:
- Մարդը ի վիճակի է մեկ օրվա ընթացքում անել ամեն ինչ: Այնպես որ հնարավոր է հասցնել, որ ոչ մեկը չտուժի:
- Ի՞նչ խորհուրդ կտաք բոլոր այն կանանց և աղջիկներին, որոնք դեռ վախենում են այս կամ այն ոլորտում գործուն քայլեր կատարել:
- Մի վախեցեք, սիրելի կանայք և աղջիկներ, ձեր ուժերը փորձել ձեր նախընտրած ոլորտներում: Եղեք համարձակ, նայեք առաջ, ձեր առջև նպատակներ դրեք և առանց վախենալու գնացեք դրանց հետևից, միաժամանակ անընդհատ կրթվեք ու ինքնակրթվեք: