Գյումրու քաղաքապետ Սամվել Բալասանյանը օգոստոսի 10-ին ընդունեց Տոկիոյի 32-րդ ամառային Օլիմպիական խաղերին մասնակցած գյումրեցի մարզիկներին: Շնորհավորելով մարզիկներին, Գյումրու քաղաքապետը նշեց, որ ակնկալիքները թեև ավելին էին, բայց, հատկապես օլիմպիական մարզաձևերում քաղաքականությունն է երբեմն իր ասելիքը թելադրում: «Ճիշտ է, մեր ցանկությունն էր, որ մեդալի գույներն ավելի պայծառ լինեին, բայց այսպես ստացվեց, ու պետք է նորից պարապել նոր հաջողությունների համար»,- շեշտեց Գյումրու քաղաքապետ Սամվել Բալասանյանը:
Հանդիպման ավարտին հունահռոմեական ոճի ըմբշամարտիկ Արթուր Ալեքսանյանը, անդրադառնալով մրցավարների որոշմանը, լրագրողներին հայտնեց. «Մեդալները բաժանում էին, չէին թողնում, որ ուժեղագույնը նվաճեր: Բողոքարկելու իմաստ չկա, սա առաջին դեպքը չէր, նույն Ռիոյի Օլիմպիական խաղերում ևս նախադեպը եղել է: Բողոքարկումը պետք է լինի նախարարության ու Օլիմպիական կոմիտեի կողմից: Մարզիկների նոր սերունդները պետք է վստահ լինեն, որ իրենք կարող են նվաճել իրենց մեդալը, ոչ թե մի մրցավար կարող է մարզիկի ճակատագրի հետ խաղալ»: Ըմբշամարտիկը նաև նշեց, որ հիասթափություն կա, բայց կփորձի նոր մրցաշարերում կրկին ապացուցել, որ ուժեղ է: «Աստված տա, նոր վնասվածքներ չունենանք ու առողջ լինենք, մնացածը կյանքը ցույց կտա»,- նկատեց Արթուր Ալեքսանյանը:
Բռնցքամարտիկ Հովհաննես Բաչկովը ևս իր դժգոհությունը հայտնեց Տոկիոյի Օլիմպիական խաղերից, բայց օլիմպիական բրոնզը իր համար մի փոքր սփոփիչ է: «Եթե ամեն ինչ արդար լիներ, այլ կերպ կլիներ ու ավելի լավ արդյունքներով հետ կգայինք»,- նշեց Հովհաննես Բաչկովը:
