ՀՀ ազգային ժողովը Հայաստանի Հանրապետության հանրային ծառայությունները կարգավորող հանձնաժողովի անդամի թափուր պաշտոնի համար քննարկում է Արա Նռանյանի թեկնածությունը:
ԱԺ փոխնախագահ Ռուբեն Ռուբինյանը հայտնեց, որ Նռանյանին առաջադրել են ընդդիմադիր երկու խմբակցությունները՝ «Հայաստան»-ը և «Պատիվ ունեմ» -ը՝ որպես համաձայնեցված մեկ միասնական թեկնածուի:
Նռանյանի թեկնածությունը ներկայացրեց «Հայաստան» խմբակցությունից Լիլիթ Գալստյանը: Նռանյանն աշխատանքային գործունեությունը սկսել է 1990 թվականից՝ մասնագիտական գործունեությամբ աշխատելով որպես գլխավոր հաշվապահ:
«Կարող եմ համոզված ասել, որ Արա Նռանյանը չունի որևէ փոխկապակցվածություն ՀԾԿՀ-ի կողմից կարգավորվող ոլորտների հետ, հետևաբար բացառելի է նրա շահերի բախումը, ինչը անաչառ և անկողմնակալ աշխատանքի գրավական է»,-ասաց Գալստյանը:
