56 կողմ, 1 դեմ, 23 ձեռնպահ ձայներով Ազգային ժողովը 2-րդ ընթերցմամբ և ամբողջությամբ ընդունեց «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ և լրացումներ կատարելու մասին» օրենքի նախագիծը:
ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանի խոսքով՝ ԱԺ «Հայաստան» խմբակցության անդամներն առաջարկություն են ներկայացրել, սակայն այն չի ընդունվել, քանի որ, փոխնախարարի խոսքով, դա հակասում է սոցիալական փաթեթի գաղափարին:
«Քաղաքացիական պայմանագիր» խմբակցության անդամ, Տնտեսական հարցերի հանձնաժողովի անդամ Բաբկեն Թունյանը ևս դեմ էր ընդդիմադիր գործընկերների ներկայացրած առաջարկներին:
«Այն առաջարկը, որ հնչեցվել է՝ սպառողական վարկերի մարումը նույնպես փոխհատուցել, կատեգորիկ անթույլատրելի առաջարկ է: Այսինքն՝ պետությունը մարդուն գումար է տրամադրում, որ մարդը կարողանա դրանով հանգստանալ, առողջությունը վերականգնել, մենք ասում ենք՝ չէ, դու կարող ես քո համար հեռախոս գնել ու այդ հեռախոսի տոկոսը փակե՞լ: Նաև առաջարկ հնչեց, որ՝ եկեք, սոցփաթեթի ընդհանուր ծավալն էլ ավելացնենք: Ուզում եմ հիշեցնել, որ այս պահին սոցփաթեթի ընդհանուր բյուջեն 10 միլիարդ դրամ է: Բոլորն էլ ուզում են, որ այդ գումարն ավելի մեծ լինի, բայց եթե նման առաջարկներ ենք հնչեցնում, նաև պիտի հասկանանք, որ այդ գումարը միշտ լինում է մեկ այլ ուղղության հաշվին»,- ասաց Թունյանը:
Հարակից զեկուցող, ԱԺ աշխատանքի և սոցիալական հարցերի մշտական հանձնաժողովի նախագահ Հերիքնազ Տիգրանյանը կոչ է արել կողմ քվեարկել նախագծին:
Հիշեցնենք՝ երեկ, մանրամասնելով օրենքի նախագծի տրամաբանությունը, Հերիքնազ Տիգրանյանը նշել էր.
«Ընդամենը մենք խոսում ենք սոցփաթեթի շահառու հանդիսացող հանրային ծառայողների սոցփաթեթի գումարները նույն գումարի շրջանակում երկու այլ ուղղությամբ օգտագործելու հնարավորություն տալու մասին: Որևէ այլ փոփոխություն՝ բյուջեի բեռի ավելացման առումով, չի նախատեսվում: Շահառուների շրջանակի ընդլայնում այս նախագծով չի նախատեսվում: Ընդամենը մենք հնարավորություն ենք տալիս այն անձանց, ովքեր համարվում են սոցփաթեթի շահառուներ, գումարներն ուղղեն ոչ միայն հիփոթեքի, այլև պետական սուբսիդավորմամբ ուսման վարկի մարմանը և նաև հնարավորություն ունենա օգտվելու սպորտային համալիրի ծառայություններից»:
Ըստ այդմ՝ սոցփաթեթի համար հատկացվող միջոցները կարող են ուղղվել նաև մարզա-առողջարարական և սպորտային համալիրների, լողավազանների և այլ սպորտային կազմակերպությունների ծառայություններից օգտվելու համար սահմանված վճարի, ինչպես նաև պետական սուբսիդավորմամբ ուսանողական վարկերի մարմանը։
Սոցփաթեթի շահառուները կկարողանան նոր ծառայություններից օգտվել սոցփաթեթի հատկացման կարգում (Կառավարության 27.12.2012 N 1691-Ն որոշում) համապատասխան ընթացակարգերը սահմանելուց հետո միայն․ ներկայումս շրջանառվում է այդ ընթացակարգերը սահմանող համապատասխան նախագիծը։
Հիշեցնենք, որ սոցիալական փաթեթի միջոցները հնարավոր է ուղղել նաև շահառուի՝ Հայաստանում և Արցախում հանգստի կազմակերպմանը, հիփոթեքային վարկի ամսական վճարի, ուսման վճարի մարմանն ու սոցփաթեթի շահառուի առողջության ապահովագրության լրացուցիչ ծառայությունների նվազագույն փաթեթի և (կամ) սոցփաթեթի շահառուի ընտանիքի անդամի առողջության ապահովագրության նվազագույն բազային փաթեթի ձեռքբերմանը։
Սոցփաթեթի շահառու են հանդիսանում ոչ միայն պետական կառավարման համակարգի աշխատողներն, այլև հանրակրթական ուսումնական հաստատությունների, գրադարանների, թանգարանների, համերգային կազմակերպությունների, թատրոնների և մի շարք այլ կազմակերպությունների աշխատողները: Սոցփաթեթի շահառու չեն հանդիսանում քաղաքական, պետական վարչական պաշտոն զբաղեցնող և մի շարք այլ բարձրաստիճան պաշտոնատար անձինք:
