Սեպտեմբերի 30-ին ՀՀ ԱԺ աշխատանքի եւ սոցիալական հարցերի մշտական հանձնաժողովի նախագահ Հերիքնազ Տիգրանյանը հանդիպել է Հայաստանի բանկերի եւ ֆինանսավարկային կազմակերպությունների աշխատողների արհեստակցական կազմակերպությունների ճյուղային հանրապետական միության նախագահ Լաուրա Հակոբյանի եւ ՀՀ վարկային կազմակերպությունների միության գործադիր տնօրեն Խորեն Քերոբյանի հետ: Հանդիպմանը մասնակցել են հանձնաժողովի անդամներ Լիլիթ Ստեփանյանը, Մարիամ Պողոսյանը եւ Ելենա Կիրակոսյանը:
Հիմնական թեման արհեստակցական կազմակերպությունների առջեւ ծառացած խնդիրներն են եղել: 2000 թվականի դեկտեմբերին է ընդունվել «Արհեստակցական միությունների մասին» օրենքը, որով սահմանվում է արհեստակցական միությունների հիմնադրման կարգը, նրանց գործունեության սկզբունքներն ու հարաբերությունները պետական, տեղական ինքնակառավարման մարմինների, իրավաբանական եւ ֆիզիկական անձանց հետ: Հերիքնազ Տիգրանյանը նշել է, որ Կառավարության ծրագրում հստակ նշված է արհեստակցական կազմակերպությունների դերի ու նշանակության մասին, մատնանշված են նրանց հզորացման ուղղությունները: Հանձնաժողովի նախագահը նաեւ տեղեկացրել է, որ «Ֆրիդրիխ Էբերտ» հիմնադրամի ներկայացուցիչների հետ քննարկվել են արհմիությունների վերաբերյալ հարցերը: Նա շեշտադրել է այս կազմակերպությունների գործունեության թափանցիկության ու հաշվետվողականության անհրաժեշտությունը: «Բարեփոխված օրենսդրություն եւ հզորացված գործիքակազմ պետք է ունենան արհմիությունները»,- ասել է Հերիքնազ Տիգրանյանը:
Ոլորտի ներկայացուցիչները խոսել են համակարգի խնդիրներից, տեղեկացրել, որ դեռեւս այս տարվա մայիսին մշակել են գործընկերության եռակողմ համաձայնագիր ԿԲ-ի, արհմիությունների եւ Բանկերի միության միջեւ, որը կյանքի կոչելով՝ արհմիություններին բազմակողմ գործունեթյուն ծավալելու հնարավորություն կտրվի: Նրանք կարեւորել են նաեւ միջազգային համագործակցությունը: Բանախոսները փաստել են, որ արհմիությունները չպետք է քաղաքականացվեն, այլ պետք է ծառայեն իրենց հիմնական նպատակին՝ աշխատողների շահերի պաշտպանությանը:
Նշվել է նաեւ, որ նմանօրինակ աշխատանքային հանդիպում-քննարկումները կլինեն շարունակական:
