Գորիսի քաղաքապետ Առուշ Առուշանյանի պաշտպան Արմեն Մելքոնյանն այսօր լրագրողների հետ զրույցում հայտնեց, որ իր պաշտպանյալի դեմ ցուցմունք է տվել Քարահանուջի համայնքապետ Լուսինե Ավետյանը:

«Մի անձի հակասական ցուցմունքով գլխատում են մի ամբողջ համայնքի, և այդ մի ցուցմունքով կարող են մարդուն կալանավորվել»,-ասաց Մելքոնյանը:

Հիշեցնենք, որ Գորիսի քաղաքապետ Առուշ Առուշանյանը քիչ առաջ դատարանի որոշմամբ  երկու ամսով կալանավորվեց: Նա մեղադրվում է ՀՀ ՔՕ 35-154 հոդվածի 4-րդ մասի 2-րդ կետով (քվեարկության գաղտնիությունը խախտելը նախապատրաստելը), ՀՀ ՔՕ 38-149 հոդվածի 2-րդ մասի 4-րդ կետով (ընտրական իրավունքի իրականացմանը խոչընդոտելը, կազմակերպելը կամ օժանդակելը, որը կատարվել է պաշտոնեական դիրքը օգտագործելով), ՀՀ ՔՕ 38-154 հոդվածով (քվեարկության գաղտնիությունը խախտելը կազմակերպելը կամ օժանդակելը):

Արմեն Մելքոնյանն ընդգծեց՝ Ավետյանն իր ցուցմունքը մի քանի օր հետո փոխել է. «Նա սկզբում ամբողջովին հերքել է, որ Առուշանյանն իրեն որևէ բան ասել է, հետագայում 3 անգամ հարցաքննվել է, մեկ ցուցմունքով ասել է՝ այո, Առուշանյանն ինձ ասել է «Հայաստան» դաշինքի համար բան անել»,-նշեց Գորիսի քաղաքապետի պաշտպանը և հավելեց՝ դատարանի որոշումը բողոքարկելու են Վերաքննիչ դատարանում:

Քարահունջի համայնքապետը, հիշեցնենք, մեղադրվում է ընտրական իրավունքի իրականացմանը, ընտրական հանձնաժողովների աշխատանքներին կամ ընտրությանը մասնակցող անձանց լիազորությունների իրականացմանը խոչընդոտելու և քվեարկության գաղտնիությունը խախտելու մեջ: