ՀՀ նախագահի պաշտոնակատար Ալեն Սիմոնյանը «Ֆեյսբուք»-ի իր էջում ցավակցել է երգահան Արթուր Գրիգորյանի մահվան կապակցությամբ:
«Խորին ցավակցությունս Արթուր Գրիգորիչի ընտանիքին, մտերիմներին եւ երկրպագուներին: Հավերժ կապրեք Ձեր արվեստով, ՄԱԵՍՏՐՈ…»,- գրել է նա:
Երկարատև հիվանդությունից հետո 63 տարեկանում կյանքից հեռացել է կոմպոզիտոր, երգահան, Հայաստանի ժողովրդական արտիստ Արթուր Գրիգորյանը: Երգահանը մահացել է այսօր հիվանդանոցում:
Արթուր Գրիգորյանը 1994 թվականին հիմնադրել է Հայաստանի երգի պետական թատրոնը:
Հեղինակել է «Այո», «777», «Ասուպ», «Ընծա» մրցանակաբաշխությունները, «Հենց այսպես», «Տես» հեռուստահաղորդումները, «Կանաչ գոտի», «Արցախի ձայներ» նախագծերը, Հայաստանի «Զաքյան» ֆոնդի հովանավորչական ամենամյա հեղինակ-կատարողների մրցանակաբաշխությունը։
Նախաձեռնել և ղեկավարել է Երևանի գեղարվեստաթատերական ինստիտուտի էստրադային կուրսը։ Հեղինակել է բազմաթիվ երգեր, մանկական մյուզիքլներ, զանգվածային միջոցառումներ, փառատոներ, թեմատիկ և էստրադային համերգներ:
Պարգևատրվել է Հայաստանի և Արցախի պետական շնորհակալագրերով և մրցանակներով:
1996 թվականին Գրիգորյանն արժանացել է Մովսես Խորենացու մեդալի, 2003 թվականին արժանացել է ՀՀ արվեստի վաստակավոր գործչի, 2011 թվականին՝ ՀՀ ժողովրդական արտիստի կոչման: 2008-ին ստացել է «Հայրենիքին մատուցած ծառայությունների համար» 1-ին աստիճանի մեդալ: