ՀՀ ԱԺ «Պատիվ ունեմ» խմբակցության ղեկավար, ընդդիմադիր պատգամավոր Հայկ Մամիջանյանն այսօր Ազգային ժողովում լրագրողների հետ զրույցում բացահայտ կերպով հայտարարեց, որ, եթե հարկ լինի, ընդդիմությունը արյամբ էլ կփոխի Երևանը։
Վերջինս հավաստիացրեց, որ դրա համար անելու են ամեն ինչ։
«Երևանը փոխվելու է մեր բոլորի, դրսում կանգնած քաղաքացիների, հայրենասերների քրտինքով, և եթե Փաշինյանն անմտություն անի՝ նաև արյամբ։ Վստահեցնում եմ, որ այն, ինչ մենք պարտավոր ենք անել, անում ենք և ուրախ կլինենք, որ մեր կողքին կանգնեն մեր հայրենասեր քույրերն ու եղբայրները, այլընտրանք չկա»,- ասաց նա։
Հարցին՝ արդյոք այս հայտարարությունը չի՞ դիտարկվի որպես բռնության կոչ, Մամիջանյանը կրկնեց․ «Եթե Փաշինյանն անմտություն անի և նորից, ինչպես անցած տարվա հունիսին, խաղաղ ցուցարարների նկատմամբ կիրառի հատուկ միջոցներ, այսինքն՝ կրակ բացի, մեկնաբանությունները թողնում եմ ձեզ։ Բայց ես վստահ եմ, որ հայրենիքի գոյությունը, ապագան արժանի է ցանկացած զոհուղության»:
Ընդդիմության ներկայացուցիչն ասաց, որ պետք է սպասել մի քանի ժամ, իսկ ցանկացած տեղեկատվություն, որը կտրամադրվի, կվնասի իրենց գործողությունների հաջողացմանը։
«Քաղաքացիական պայմանագիր» խմբակցությունից արձագանքել են ԱԺ «Պատիվ ունեմ» խմբակցության ղեկավար Հայկ Մամիջանյանի այսօրվա հայտարարությանը:
ՔՊ-ական պատգամավոր Ծովինար Վարդանյանը ասաց. «Լրահոսում աչքովս ընկավ, որ ԱԺ պատգամավորներից մեկը ԱԺ միջանցքներերից մեկում ճեպազրույց էր տալիս եւ բացի այն, որ ինչ-որ խորհրդավորություն էր հաղորդում իր խոսքերին, եւ փորձում էր նաեւ երկիմաստություն մտցնել, խորիմաստ դեմքով ինչ-որ բաներ էր ակնարկում ժողովրդին, նա չխորժեց հանդես գալ բռնության կոչով՝ ասելով, որ արյամբ է փոխվելու Երեւանը:
Պարոն պատգամավոր, ո՞ւմ արյամբ եք պատրաստվում փոփոխություն անել, արդյոք ՀՀ քաղաքացին ձեզ համար ռեսո՞ւրս է ընդամենը` ձեր անձնական շահն ու նկրտումները իրականություն դարձնելու համար:
Ես կարծում եմ՝ ՀՀ ամեն մի քաղաքացու արյուն պետք է թանկ լինի Հայաստանի ԱԺ պատգամավորի համար: Ես հասկանում եմ ձեր աշխատելաոճը, ապրելաոճը՝ կեղտոտ ջրում ձուկ որսալու, դրա համար ձեր բոլոր խոսափողերը միացված են, տարբեր մարդիկ տարբեր հարցազրույցներ ու ճեպազրույցներ են տալիս: Նաեւ հասկանում եմ՝ ինչից է դա գալիս, որովհետեւ բանաձեւի արդյունքում մանդատ շահած պատգամավորը գուցե չի հասկանում քաղաքացու եւ իր մանդատի միջեւ եղած կապը»», - ասաց Վարդանյանը:
Նա Մամիջանյանին խորհուրդ տվեց այնպես անել, որ ՀՀ քաղաքացին կիսի իր կարծիքը:
ԱԺ միջանցնքներում իրենց հիմնական գործունեությունը ծավալող «Պատիվ ունեմ» խմբակցության ղեկավարը ԱԺ ամբիոնից հեռու մի մութ անկյունում հայտարարել է, որ «եթե Փաշինյանն անմտություն անի, նաև արյամբ է փոխվելու Երևանը, մենք մեր անելիքն անելու ենք»։ Այս մասին Facebook-ի իր էջում գրել է ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը:
«Ադրբեջանի պատգամավորների հետ համատեղ ԵԽԽՎ-ում պռոհայկական նախագծին դեմ քվեարկած այս երիտասարդին խորհուրդ կտամ առհասարակ չխոսել անմտությունից, էլ չասեմ հայրենիքի և բարոյականության մասին, և կառաջարկեմ հավաքել ողջ ուժերը, կենտրոնանալ, մի կողմ դնել բոլոր վախերը և գալ ու նման «հուժկու» մտքերը հնչեցնել բոլորիս դիմաց կանգնած՝ ԱԺ ամբիոնից»,-գրել է նա:
