Իրանի հակաօդային պաշտպանության (ՀՕՊ) ստորաբաժանումները երկրի տարածքի մեծ մասում, իրական պատերազմական իրավիճակների մոդելավորմամբ, զորավարժություններ կանցկացնեն:
Զորավարժությունների հրամանատար գեներալ Քադեր Ռահիմզադեն հայտնել է, որ դրանք կմեկնարկեն հոկտեմբերի 21-ին, հայտնում են Իրանի ԶԼՄ-ները:
Իրանի բանակի եւ Իսլամական հեղափոխության պահապանների կորպուսի համատեղ զորավարժություններն ուղղված են մարտական պատրաստականության բարձրացմանն ու հակաօդային պաշտպանության ուժերի կարողությունների ամրապնդմանը:
Զորավարժությունները ընթացքում կիրառվելու են հրթիռային համակարգեր, ռադիոէլեկտրոնային մարտերի համակարգեր՝ փոքր, միջին եւ մեծ բարձրություններում օդային սպառնալիքներին դիմակայելու համար:
Զորավարժությունների հրամանատարն ասել է, որ օգտագործվելու են նաեւ կործանիչներ, ռմբակոծիչներ ու անօդաչու թռչող սարքեր:
