Մայիսի 1-2-ը Ղրղզստանում սգո օր է հայտարարվել Տաջիկստանի հետ սահմանին տեղի ունեցած բախումների հետևանքով: Երկրի նախագահի մամուլի ծառայության տարածած հաղորդագրության մեջ ասվում է.
«Ղրղզստանի նախագահ Սադիր Ժախարովը հրամանագիր է ստորագրել, որի համաձայն 2021-ի մայիսի 1-2-ը սուգ է հայտարարվել»,-նշվում է հաղորդագրության մեջ:
Երկու երկրների միջև հակամարտությունը սկսվել էր ապրիլի 29-ին, որը վերածվել էր ռազմական դիմակայության: Ղրղզստանի ու Տաջիկստանի սահմանապահների միջև բախումը տևել են ավելի քան վեց ժամ: Երկու կողմից մահացել է մոտ 40 մարդ, ավելի քան 200-ը՝ տուժել են: Ապրիլի 29-ի երեկոյան կողմերը համաձայնության են եկել դադարեցնել կրակն ու սահմանից հետ քաշել զորքերը:
Ղրղզստանի ազգային անվտանգության սահմանապահ ծառայությունը հայտնել է, որ Տաջիկստանի զինվորականները մայիսի 1-ին սկսել են կրակել ղրղզական տարածքի ուղղությամբ: Նշվում է, որ կրակի թիրախում են հայտնվել բնակելի տները: Ավելի վաղ սահմանապահ ծառայությունը հաղորդագրություն էր տարածել այն մասին, որ սահմանին Տաջիկստանի կողմից ռազմական տեխնիկայի տեղաշարժ է նկատվել: Sputnik Տաջիկստանի Telegram-ի բաժանորդները հայտնում են սահմանամերձ բնակավայրերում հրդեհների մասին: