ԱՄՆ-ի արևմուտքում մոլեգնող անտառային հրդեհների ծուխը հասել է ոչ միայն երկրի արևելյան շրջաններ, այլև Եվրոպայի մի շարք հյուսիսային պետություններ: Այս մասին հայտնել է մթնոլորտի մշտադիտարկման եվրոպական ծառայությունը:
«Համեմատելով ԱՄՆ-ում հրշեջ ակտիվությունը նախորդ տարիների հետ՝ մթնոլորտի մշտադիտարկման եվրոպական ծառայությունը նկատել է, որ ԱՄՆ-ում այս տարի ակտիվությունը տասնյակ-հարյուրավոր անգամներ ավելի ինտենսիվ է, քան 2003-2019 թվականներին», - նշվում է հաղորդագրությունում:
Փորձագետները հայտարարել են, որ ծուխը երկրի արևմուտքից տարածվել է Հյուսիսային Ամերիկայում և Կանադայում, որտեղից հասել է Հյուսիսային Եվրոպա: Կանխատեսումների համաձայն՝ սեպտեմբերի 19-20-ը ծուխը կրկին կհատի Ատլանտյան օվկիանոսը։
ԱՄՆ-ի արևմուտքում խոշոր հրդեհները մոլեգնում են օգոստոսից։ Աղետի պատճառ են դարձել անոմալ շոգն ու կայծակը։ Օդի բարձր ջերմաստիճանի, խոնավության ցածր մակարդակի և քամիների պատճառով արագորեն տարածվող հրդեհների դեմ պայքարում են հազարավոր հրշեջներ, սակայն նրանց դեռևս չի հաջողվում մարել կրակը։
ԱՄՆ արևմտյան նահանգներում նվազագույնը 28 մարդ է մահացել վերջին շաբաթներին մոլեգնած անտառային հրդեհների հետևանքով։