Արարատի մարզի Երասխ համայնքի ղեկավար, հակառակորդի կրակոցից վիրավորում ստացած Ռադիկ Օղիկյանին վիրահատել են, նրա ինքնազգացողությունը լավ է: «Արմենպրես»-ի հետ զրույցում այս մասին ասաց Օղիկյանի հորեղբորորդին՝ Արթուր Օղիկյանը:
«Լավ է իր առողջական վիճակը, նորմալ է ամեն ինչ: Լավ է զգում իրեն»,- ասաց Արթուր Օղիկյանը՝ հայտնելով, որ նրան վիրահատել են առավոտյան:
Երասխի համայնքապետը «Աստղիկ» ԲԿ-ում է: Թե դեռ ինչքան կմնա այնտեղ, հորեղբորորդին ասել չկարողացավ:
Արարատի հիվանդանոցի տնօրեն Արայիկ Սարդարյանն ավելի վաղ հայտնել էր, որ Արարատի մարզի Երասխի համայնքապետ Ռադիկ Օղիկյանը հայ-ադրբեջանական սահմանի Երասխի հատվածում հակառակորդի կրակոցների արդյունքում վիրավորում է ստացել թևի շրջանում: Համայնքապետին «Աստղիկ» ԲԿ էին տեղափոխել գիշերը:
Ադրբեջանի պաշտպանության նախարարությունը հայտնում է Նախիջևանի սահմանային հատվածում ադրբեջանցի զինծառայողի վիրավորվելու մասին:
Ինչպես տեղեկացնում է «Արմենպրես»-ը, Ադրբեջանի պաշտպանության նախարարության տարածած հաղորդագրության համաձայն` գնդակոծության հետևանքով ադրբեջանական բանակի զինծառայող, ավագ լեյտենանտ Բադալի Ռամալ Բահլուլօղլուն ոտքի շրջանում հրազենային վիրավորում է ստացել: Վիրավորին ցուցաբերել են առաջին բուժօգնություն, նրան տեղափոխել են բժշկական հաստատություն:
