Միջազգային բազմաթիվ հեղինակավոր լրատվամիջոցներ անդրադարձել են Լեռնային Ղարաբաղում Ադրբեջանի ծավալած ռազմական գործողություններին, որոնք, ակնհայտորեն, ուղղված են տեղի բնակչության էթնիկ զտմանը։
POLITICO պարբերականը նշում է, որ էթնիկ հայերին «վտանգավոր հատվածներից տարհանելու» մասին Բաքվի հայտարարությունը անմիջապես առաջացրել է էթնիկ զտման մտավախություններ։
Պարբերականը թերահավատորեն է մոտենում Ադրբեջանի այն պատճառաբանություններին, թե հարձակումը տեղի է ունեցել՝ ի պատասխան ականների վրա մեքենաների պայթեցման, որի հետևանքով «ադրբեջանական կողմն ունի 6 զոհ»։
«Այնուամենայնիվ, նրանք (խմբ․՝ Ադրբեջանի կառավարությունը) ոչ մի կերպ չեն նշում, թե ինչպես են Ղարաբաղի պաշարված հայերը տեղադրել այդ զենքերը», - նշվում է հրապարակման մեջ։
POLITICO-ն նաև նշում է, որ տարածաշրջանում պատերազմի վերսկսման վտանգը ԵՄ-ի համար մեծ հետընթաց է։
«Կովկասում պատերազմի վերսկսման հեռանկարը ռազմավարական և դիվանագիտական մեծ հետընթաց է ԵՄ-ի համար, որը սիրաշահում է Ադրբեջանին որպես դաշնակից և գազի մատակարար՝ որպես այլընտրանք Ռուսաստանին», - նշվում է հոդվածում։
Բաքվի մեկնարկած ռազմական գործողություններին հետևում է նաև OC Media լրատվական հարթակը՝ ներկայացնելով Հայաստանի և Ադրբեջանի տարածած պաշտոնական հաղորդագրությունները, ինչպես նաև լուսանկարներով ցույց տալով ադրբեջանական ագրեսիայի հետևանքով Ստեփանակերտի քաղաքացիական ենթակառուցվածքներին հասցված վնասները։ Լրատվական հարթակը նշում է նաև, որ ուժի կիրառումը քննադատվել է ադրբեջանական որոշ քաղաքական ակտիվիստների կողմից, որոնք, ըստ հաղորդումների, նման հրապարակումների համար կանչվել են Ադրբեջանի պետական անվտանգության ծառայություն։
Արցախի դեմ Ադրբեջանի լայնածավալ հարձակմանը, հիմնականում պաշտոնական հայտարարությունների վկայակոչմամբ, անդրադարձել են տարբեր պարբերականներ և գործակալություններ, այդ թվում՝ Reuters-ը, BBC-ն, Associated Press-ը, CNN-ը, The Guardian-ը, France 24-ը, Al Jazeera-ն, ՏԱՍՍ-ը, ՌԻԱ Նովոստի-ն, Ինտերֆաքս-ը։
Ադրբեջանի կողմից Արցախի դեմ 2023 թվականի սեպտեմբերի 19-ին սանձազերծված հերթական լայնածավալ ագրեսիայի հետևանքով քաղաքացիական բնակչության շրջանում արձանագրվել է 2 զոհ (1 երեխա), 26 վիրավոր (11 երեխա)։
