ԱՄՆ պետքարտուղար Էնթոնի Բլինքենը հայտարարություն է տարածել Լեռնային Ղարաբաղ մարդասիրական օգնության մատակարարման վերաբերյալ: Հայտարարության մեջ, մասնավորապես, ասված է.
«Մենք ողջունում ենք մարդասիրական ապրանքների միաժամանակյա առաքումը ԼՂ` Լաչինի միջանցքով և Աղդամի ճանապարհով, մի մոտեցում, որը նախագահ Ալիևը և ես վերջերս քննարկել ենք։ Այս խիստ անհրաժեշտ պաշարների մատակարարումները քայլ առաջ են, և մենք կողմերին խրախուսում ենք ներգրավվել ուղիղ բանակցություններում և կենտրոնանալ տարածաշրջանի բնակչությանը մարդասիրական մատակարարումների հոսքն ավելացնելու ուղիների վրա: Միացյալ Նահանգները շարունակում է աջակցել Հայաստանի և Ադրբեջանի` երկարամյա խնդիրների լուծմանն ու արժանապատիվ և երկարատև խաղաղության հասնելու ջանքերին»։
Ֆրանսիայի արտգործնախարար Կատրին Կոլոննան էլ X-ի (նախկին Twitter) իր միկրոբլոգում անդրադարձել է Լաչինի միջանցքով և Աղդամի ճանապարհով Լեռնային Ղարաբաղ տեղափոխված հումանիտար բեռին։
«Երկու հումանիտար ավտոշարասյուն Լեռնային Ղարաբաղ են ժամանել Լաչինի և Աղդամի անցակետերով։ Սա պետք է լինի առաջին քայլը միջազգային իրավունքի և Արդարադատության միջազգային դատարանի որոշման համաձայն անվերապահ և անարգել մարդասիրական մուտքի ճանապարհին»,- գրել է դիվանագետը։
