ԵՄ-ի հետ Հայաստանի կապի մասին խոսելով Կիպրոսի ԱԳ նախարար Կոնստանտինոս Կոմբոսը ՀՀ ԱԳ նախարարի հետ համատեղ ասուլիսում ասաց, որ Կիպրոսն աջակցում է հարաբերությունների խորացմանը և ԵՄ ներկայության ավելացմանը Հայաստանի Հանրապետությունում։
«Մենք վճռականորեն կաջակցենք տնտեսական և քաղաքական միջոցառումներին, որոնք Հայաստանին կմոտեցնեն Եվրամիությանը, միևնույն ժամանակ կխթանեն բարեփոխումների օրակարգը»,- ասաց նա։
Նախարարը նաև հայտնեց 10 ջերմոցների կառուցման մասին՝ աջակցելու Լեռնային Ղարաբաղից բռնի տեղահանված հայերին։ Կոնստանտինոս Կոմբոսը անհանդուրժելի որակեց ագրեսիան և տեղահանումը, նշելով, որ հարկադրանքը և ուժի կիրառումը չի կարող լինել երկխոսության այլընտրանք, ընդգծելով, որ պետք է հարգվի ինքնիշխանությունը և տարածքային ամբողջականությունը։
