«Համակարգը նորմալ աշխատում է, բայց, իհարկե, հասկանում ենք, որ ցանկացած նոր ինստիտուտի ներդրման պարագայում լինում են նաև համակարգից օգտվելու բարդություններ, տեղեկատվության պակաս»:
Այս մասին Կառավարության նիստից հետո լրագրողների հետ ճեպազրույցի ժամանակ ասաց առողջապահության նախարար Անահիտ Ավանեսյանը՝ անդրադառնալով էլեկտորանային դեղատոմսի համակարգի ներդրմանը:
«Մենք ամենօրյա ռեժիմով հավաքագրում ենք բոլոր խնդիրներն ու բողոքները, եթե խնդիրներ կան, դրանց արագ լուծում են տրվում, ամփոփվում են ամենաշատ տրվող հարցերը, և օրական ռեժիմով մենք պատասխանում ենք դրանց: Այս օրերի ընթացքում մոտ 40 հազար դեղատոմս է դուրս գրվել, այս թիվը խոսում է այն մասին, որ համակարգը նորմալ աշխատում է: Իհարկե, ես նաև հայցում են այն քաղաքացիների ներողամտությունը՝ հասկանալով, որ ցանկացած էլեկտրոնային և նման մեծ թվով անձանց վերաբերելի բարեփոխումների ընթացքում առաջին օրերին լինում են բարդություններ, բայց հասկանում ենք, որ այս բարեփոխումները նպաստում են առաջին հերթին մեր քաղաքացիների առողջության պահպանմանը»,- նշեց Ավանեսյանը:
Հարցին, թե ինչի՞ն են վերաբերում բողոքները, Ավանեսյանն արձագանքեց. «Բողոքները վերաբերում են տեղեկատվության պակասին, այսինքն՝ մարդկանց մոտ երբեմն շփոթություն է լինում, որ, օրինակ, միևնույն դեղը մի քանի անգամ ձեռք բերելու համար ամեն անգամ պիտի գնան դեղատոմս ստանալու: Մենք ասում ենք, որ՝ ոչ, անհրաժեշտություն չկա, մեկանգամյա դեղատոմսով կարող են բավականին երկար ժամանակի համար դուրս գրվեն դեղեր, և ամեն անգամ դրա համար քաղաքացին բժշկի չգնա»:
Հիշեցնենք, որ մարտի 1-ից հակաբիոտիկների նշանակումը լինելու է էլեկտրոնային դեղատոմսով, քաղաքացիները բժշկի կողմից նշանակված դեղերը դեղատներից կկարողանան գնել ոչ թե թղթային տարբերակով՝ դեղատոմսերի միջոցով, այլ էլեկտրոնային եղանակով:
