1981 թվականի մարտի 7-ին տեղի է ունեցել Երևանի մետրոպոլիտենի բացման հանդիսավոր արարողությունը։ Շահագործվել էր 5 կայարան՝ «Բարեկամություն» , «Մարշալ Բաղրամյան» «Երիտասարդական», «Հանրապետության հրապարակ», «Սասունցի Դավիթ», իսկ հետագայում՝ 1983թ. շահագործման են հանձնվել «Գործարանային» , 1984թ. ` «Շենգավիթ», 1986թ.՝ «Գարեգին Նժդեհի հրապարակ», 1989թ.՝ «Զորավար Անդրանիկ» և 1997թ.՝ «Չարբախ» կայարանները։
«Կարեն Դեմիրճյանի անվան Երևանի մետրոպոլիտենը» ներկայումս ունի ավելի քան 12 կմ ընդհանուր շահագործվող երկարության գիծ (մեկ ուղղությամբ), 10 կայարան։
Երևանի մետրոպոլիտենի ֆեյսբուքի էջում լուսանկարներ են հրապարակված։
«Կարեն Դեմիրճյանի անվան Երևանի մետրոպոլիտեն» ՓԲԸ –ի գլխավոր տնօրենի ժ/պ Բաբկեն Սեդրակյանի շնորհավորական ուղերձը մետրոպոլիտենի շահագործման 43-ամյակի առթիվ
Սիրելի՛ հայրենակիցներ,
սրտանց շնորհավորում եմ Երևան քաղաքի խորհրդանիշներից մեկի՝ Կարեն Դեմիրճյանի անվան Երևանի մետրոպոլիտենի 43-րդ տարեդարձի առթիվ։
Այսօր հիանալի առիթ է ևս մեկ անգամ արժևորելու Երևանի մետրոպոլիտենի դերն ու առաքելությունը հանրային տրանսպորտի ոլորտում։
Մետրոն ամբողջ աշխարհում համարվում է ամենաարագ, անվտանգ, անխափան ու հարմարավետ հասարակական տրանսպորտային միջոցը և այս օրն ունենալու համար՝ մենք պարտական ենք մետրոպոլիտենի մտահղացման ու ստեղծման համար պայքարող պետական այրերին, նախագծողներին, շինարարներին ու մեր վաստակաշատ աշխատակիցներին, ովքեր ջանք ու եռանդ չեն խնայել ու խնայում այն կայացնելու և զարգացնելու գործում։
Սիրելի՛ աշխատակիցներ,
Համոզված եմ, որ Ձեր հետևողական, նվիրված և սրտացավ աշխատանքի շնորհիվ կկարողանաք լավագույնս իրականացնել Երևանի մետրոպոլիտենի առջև դրված խնդիրներն ու հաղթահարել դժվարությունները:
Սիրելի՛ ուղևորներ
Մետրոպոլիտենի աշխատակազմի և անձամբ իմ անունից շնորհավորում եմ բոլորիս այս հիշարժան օրվա կապակցությամբ և ցանկանում՝ որպեսզի բարությունն, ազնվությունն ու լավատեսությունը լինեն մեր մշտական ուղեկիցը։
Մաղթում եմ բոլորիս արագ, անվտանգ ու անխափան երթևեկություն։
