"Որևէ պաշտոնական ձևաչափում միջանցք բառը բացի Լաչինից, այլ համատեքստում չի կարող օգտագործվել. ՀՀ տարածքային ամբողջականությունը սակարկման ենթակա չէ և ինչքան էլ սրա մասին խոսի Ալիևը, պետք է հաշվի առնենք, որ սրանք կարող են լինել նկրտումներ, բայց տեղ չեն կարող գտնել բանակցային գործընթացում", - հայտնել է ՀՀ ԱԺ «Քաղաքացիական պայմանագիր» խմբակցության պատգամավոր, ՀՀ ԱԺ արտաքին հարաբերությունների հանձնաժողովի անդամ Հռիփսիմե Գրիգորյանը։
Ադրբեջանի նախագահ Իլհամ Ալիևի՝ «միջանցքի» մասին հայտարարություններն ուղղված են ներքին լսարանին, որևէ պաշտոնական բանակցությունում Հայաստանի ինքնիշխան տարածքով որևէ «միջանցքի» մասին խոսակցություն չկա և չի էլ կարող լինել: Խորհրդարանական ճեպազրույցում այս մասին պաշտոնապես հայտարարեց ՀՀ ազգային ժողովի «Քաղաքացիական պայմանագիր» խմբակցության պատգամավոր Հռիփսիմե Գրիգորյանը:
Պատգամավորն ընդգծեց՝ որքան էլ Ալիևը կամ Ադրբեջանի այլ պաշտոնյա խոսեն «միջանցք»-ի մասին, պաշտոնական հայտարարությունները, պաշտոնական հանդիպումներին հետևող հաղորդագրություններն այլ բանի մասին են խոսում: Որպես օրինակ՝ Գրիգորյանը հիշեցրեց, որ վերջերս Ժնևում ԵՄ միջնորդությամբ Հայաստանի և Ադրբեջանի ԱԳ նախարարների հանդիպումից հետո տարածված հաղորդագրությունում ևս շեշտվել է՝ դրական է գնահատվել երկուստեք ըմբռնումը, որ տարածաշրջանային տրանսպորտային ուղիները պիտի ապաշրջափակվեն երկրների ինքնիշխանության և իրավազորության ներքո։
«Որևէ պաշտոնական ձևաչափում, որևէ տեղ ընդհանրապես «միջանցք» բառը, բացի Լաչինից, այլ համատեքստում չի կարող օգտագործվել: Հայաստանի տարածքային ամբողջականությունը սակարկման, բանակցման ենթակա չէ: Եվ ինչքան էլ սրա մասին խոսի Ալիևը կամ որևէ այլ պաշտոնյա, մենք պետք է հասկանանք, որ դրանք կարող են լինել ցանկություններ, նկրտումներ, բայց երբեք չեն կարող տեղ գտնել պաշտոնական բանակցային գործընթացում: Պաշտոնապես ևս մեկ անգամ հայտարարում եմ՝ չկա մեր ինքնիշխան տարածքից որևէ միջանցքի մասին խոսակցություն որևէ պաշտոնական բանակցությունում, և սրա մասին փաստում են բոլոր հայտարարությունները, որոնք հրապարակվել են տարբեր ձևաչափերով»,-շեշտեց Գրիգորյանը:
Պատգամավորն ընդգծեց՝ դրանք ներքին լսարանին ուղղված հայտարարություններ են ադրբեջանական կողմից: Նա կարևորեց նաև միջազգային հանրության ընկալումն այս հարցում՝ հավելելով, որ այսօր միջազգային հանրությունը շատ հստակ, ուղիղ և աներկբա արձանագրում է, որ ՀՀ տարածքային ամբողջականությունը կարմիր գիծ է նաև միջազգային հանրության համար:
«Չի կարող խոսք գնալ որևէ միջանցքի մասին, որը կլինի ՀՀ ինքնիշխան տարածքում: Չի կարող այսպիսի խոսակցություն լինել»,-եզրափակեց պատգամավորը:
