«Պիտի արձանագրենք, որ տվյալ պարագայում երթուղու փոփոխությունը տեղի ունենալու պարագայում այն տարածքները, որոնք չեն գտնվում ԼՂ ինքնավար մարզի նախկին այդ սահմանի մեջ, այդ հատվածում նրանք անցնելու են Ադրբեջանի վերահսկողությանը»,- ասաց ՀՀ վարչապետ ՀՀ վարչապետ Նիկոլ Փաշինյանը՝ ԶԼՄ-ներին և հասարակական կազմակերպություններին տված առցանց ասուլիսի ընթացքում` պատասխանելով հարցին, թե Ադրբեջանի կողմից Բերձորը շրջանցող նորակառույց ճանապարհի շահագործման դեպքում ինչ ճակատագիր է ունենալու Բերձոր, Աղավնո և Սուս համայնքների բնակչությունը։
Նա նշեց, որ Լաչինի բնակիչների խնդիրներն իրենք կառավարության որոշումներով լուծում են, և բնակիչները, բնականաբար, պիտի բնակարանով ապահովվեն։
«Բայց այդտեղ գյուղեր է թվարկվում, ես անկեղծ ասած վստահ չեմ, որ խոսքը այդ բոլոր բնակավայրերի մասին է։ Նաև Արցախի իշխանության հետ այդ հարցերը քննարկում ենք և Լաչինում այսօր, ըստ էության, ընտանիքներ չեն ապրում, և կառավարության որոշումներով նրանց խնդիրները լուծել են։ Եվ Աղավնո գյուղի բնակիչների խնդիրները Արցախի կառավարության միջոցներով կարծում եմ՝ կլուծվեն»,-ասաց վարչապետը։
Ինչ վերաբերում է Սուս գյուղին, վարչապետն ասաց, որ համենայնդեպս, Արցախի իշխանությունների հետ աշխատանքային քննարկումներում Սուս գյուղի անուն չի շոշափվել, բայց նաև լրացուցիչ պարզաբանման կարիք կա, եթե այդպիսի հարց ծագել է։
