«Դիմադրություն» շարժման ցուցարարները վաղ առավոտից բողոքի ակցիաներ են անցկացնում Երևանի փողոցներում՝ պահանջելով ՀՀ վարչապետ Նիկոլ Փաշինյանի հրաժարականը։ Կան բերման ենթարկվածներ:
Մի խումբ ընդդիմադիրներ փակել էին Նալբանդյան փողոցը։ Փակվել են նաև Պուշկին-Կողբացի, Աբովյան-Իսահակյան, Տերյան-Իսահակյան խաչմերուկները, Գայի պողոտան, Արցախի փողոցը: Ընդդիմադիրներն ակցիա են իրականացրել նաև Ֆուչիկի փողոցում։
Ոստիկանությունը փորձում է վերականգնել երթևեկությունը, կոչ է անում բացել ճանապարհների երթևեկելի գոտին։ Կան բազմաթիվ բերման ենթարկվածներ։
Նրանց թվում այսօր կրկին ՀՀԿ-ական նախկին պատգամավոր Էդուարդ Շարմազանովը: Ավելի ուշ վերջինս ֆեյսբուքյան իր էջում հայտնել է, որ իրեն և նույն ոստիկանական ավտոբուսում գտնվող մյուս բերման ենթարկվածներին տանում են ոստիկանւթյան Աբովյանի բաժին:
Այսօր բերման ենթարկվածների թվում են նաև Արթուր Վանեցյանի որդին, «Հայրենիք» կուսակցության քարտուղարն ու կուսակցության բազմաթիվ անդամներ, կան բերման ենթարկված աղջիկներ ևս:
Մարդու իրավունքների պաշտպանի արագ արձագանքման խմբերը վաղ առավոտից գտնվում են ոստիկանության բաժանմունքներում բերման ենթարկված անձանց իրավունքների իրացման խնդիրները վերհանելու և պաշտպանությունն ապահովելու համար։
Ինչպես հայտնում են ՄԻՊ գրասենյակից, մինչ այս պահը ԶԼՄ հրապարակումների և տեսանյութերի ամփոփման արդյունքում Պաշտպանն արձանագրել է, որ մի շարք դեպքերում ոստիկանության ծառայողների կողմից բերման են ենթարկվում նաև առերևույթ հավաքին մասնակից չդարձած անձինք՝ ճամփեզրերից, մայթերից։
Պաշտպանի դիտարկմամբ՝ անընդունելի է համատարած ակցիայի իրականացման վայրից կամ դրան հարող տարածքից անձանց ազատությունը սահմանափակելու գործելաոճը։ Մյուս կողմից, ակցիաների մասնակիցները պարտավոր են կատարել ոստիկանության ծառայողների հասցեական ու հստակ պահանջը՝ խուսափելով վարչական ձերբակալումից։
«Միաժամանակ, պետք է նշել, որ այսօրվա՝ մինչ այս ժամի մշտադիտարկմամբ ակնհայտ է, որ որոշ դեպքերում ոստիկանության ծառայողների կողմից ճանապարհների երթևեկելի մասն ազատելու պահանջից հետո ակցիաների մասնակիցներին տրամադրել են ողջամիտ՝ 5 րոպե ժամանակ այն կատարելու համար, և ուսումնասիրությունը ցույց է տալիս, որ նման դեպքերում հիմնականում անձանց վարչական ձերբակալման անհրաժեշտություն չի առաջանում»,- նշված է Պաշտպանի տարածած հաղորդագրության մեջ:
