Ռուսաստանի արտաքին գործերի նախարար Սերգեյ Լավրովը Հայաստանին եւ Ադրբեջանին կրակի անհապաղ դադարեցման կոչ է արել:
Այդ մասին ասվում է ՌԴ ԱԳՆ հաղորդագրության մեջ, որը տարածվել է Հայաստանի եւ Ադրբեջանի արտաքին գործերի նախարարների հետ Լավրովի հեռախոսազրույցներից հետո:
«Սերգեյ Լավրովը կողմերին կոչ է արել անհապաղ դադարեցնել կրակը եւ զսպվածություն դրսեւորել՝ հաշվի առնելով ստանձնած պարտավորությունները», - ասված է հաղորդագրության մեջ:
Լավրովն ընդգծել է, որ Ռուսաստանը կշարունակի իր միջնորդական առաքելությունը՝ ինչպես կողմերի հետ երկկողմ շփումների, այնպես էլ ԵԱՀԿ Մինսկի խմբի եռանախագահության ձեւաչափում:
Ռուսական կողմը նաեւ կարեւորել է, որպեսզի «Մինսկի խմբի բոլոր անդամները իրադրությունը գնահատելիս պատասխանատու մոտեցում ցուցաբերեն եւ խուսափեն այնպիսի հայտարարություններից եւ գործողություններից, որոնք կարող են լարվածության հավելյալ աճ սադրել»:
