Այս պահի դրությամբ` «Սուրմալու»-ի վթարված շենքի տարածքի 95 և ավելի տոկոսը մաքրված է, լրագրողների հետ զրույցում այսօր ասաց ԱԻՆ փրկարար ծառայության տնօրեն Արմեն Գասպարյանը։
«Որոնողափրկարարական աշխատանքներն այս պահին կատարվում են պայթյունի էպիկենտրոնի հատվածում, որտեղ քիչ ավելի բարդ է իրավիճակը, այն իմաստով, որ կան վնասված-կախված երկաթբետոնե կոնստրուկցիաներ, պանելներ, որոնք պետք է նախ հեռացվեն», - ասաց ԱԻՆ պաշտոնյան՝ ավելացնելով, որ իրենց տեղեկություններով՝ բուն էպիկենտրոնում է գտնվում վերջին անհետ կորած քաղաքացին։
Գասպարյանի խոսքով՝ ճիշտ չէ այս պահին աշխատանքների ավարտի ժամկետների մասին խոսել, քանի որ բավականին ժամանակ է հարկավոր, որպեսզի հեռացվեն կախված երկաթբետոնե կոնստրուկցիաները։
«Մեզ համար շատ բարդ է լինելու հայտնաբերել որոնվող քաղաքացու մարմինը», - ասաց Արմեն Գասպարյանը։
ՀՀ աշխատանքի և սոցիալական հարցերի նախարարությունում կան քննարկումներ՝ «Սուրմալու» առևտրի կենտրոնում տեղի ունեցած պայթյունի հետևանքով զոհված քաղաքացիների ընտանիքներին և ֆիզիկապես տուժած անձանց համար պետական աջակցության ծրագիր իրականացնելու ուղղությամբ: «Արմենպրես»-ի հարցմանն ի պատասխան այս մասին տեղեկացրեց ՀՀ աշխատանքի և սոցիալական հարցերի նախարարի խոսնակ Զառա Մանուչարյանը:
«Նախարարությունում այս պահին կան քննարկումներ՝ «Սուրմալու» առևտրի կենտրոնում տեղի ունեցած պայթյունի հետևանքով զոհված քաղաքացիների ընտանիքներին և ֆիզիկապես տուժած անձանց համար պետական աջակցության ծրագիր իրականացնելու ուղղությամբ։ Միջոցառման շահառուների հստակ շրջանակի, աջակցության ձևաչափի և այլնի մասին՝ կտեղեկացնենք լրացուցիչ, երբ ունենանք առավել հստակ պատկեր»,-ասաց Զառա Մանուչարյանը։
Հարցին, թե արդյոք կլինի նաև աջակցություն՝ պայթյունից տուժած տնտեսվարողներին, Զառա Մանուչարյանը տեղեկացրեց, որ այդ հարցը ՀՀ աշխատանքի և սոցիալական հարցերի նախարարության լիազորությունների շրջանակից դուրս է։
