Արդեն երկու օր է, ինչ Լեռնային Ղարաբաղից Լաչինի միջանցքով իրականացվում է բռնի տեղահանված անձանց տեղափոխում Հայաստան: Նրանց դիմավորում և ընդունում են Կոռնիձորում տեղակայված վրանային կայանում, որտեղ նրանք ստանում են աջակցություն, գրանցում են, տեղի է ունենում առաջնային կարիքների գնահատում:
Կոռնիձոր-Գորիս ճանապարհահատվածը երթևեկության առումով չափազանց ծանրաբեռնված է: Ոստիկանության մեքենաները պարբերաբար բռնի տեղահանվածներով ավտոշարասյուներն այնտեղից ուղեկցում են Գորիս:
«Այս ամբողջ ընթացքում բռնի տեղահանվածների հոսքը չի դադարում, Կոռնիձում տեղակայված վրանային կայանն ու Գորիսում գործող կոորդինացիոն կենտրոնն աշխատում են 24-ժամյա ռեժիմով, որպեսզի հնարավորինս արագ և արդյունավետ հասցեագրվեն մարդկանց կարիքները: Նրանց փաստաթղթավորումն իրականացվում է տեղում, գրանցվում են, որպեսզի հետո նրանց հոգսերը հոգալու գործընթացը սկսվի: Ժամը 17:00-ի տվյալներով՝ Լեռնային Ղարաբաղից արդեն իսկ Հայաստան է մուտք գործել 6650 բռնի տեղահանված: Նրանց աջակցելու աշխատանքները շարունակական են, պետական բոլոր պատասխանատու մարմինները ներգրավված են մեր հայրենակիցներին օգնելու գործընթացում, որպեսզի բոլոր խնդիրները հնարավորինս լուծվեն»,- ասաց Սարգսյանը:
Լեռնային Ղարաբաղից բռնի տեղահանվածների թվում բավականին շատ են տարեցներն ու երեխաները: Կան նաև շատ քաղաքացիներ, որոնց ընտանիքի անդամները դեռ գտնվում են Լեռնային Ղարաբաղում և պարբերաբար տեղակացնում են, թե ինչ փուլում է գտնվում հարազատների տեղափոխումը:
«Կառավարությունը նախապես հայտարարել էր 40 հազար ընտանիք ընդունելու մասին: Անհրաժեշտության դեպքում կարողությունները պետք է մեծանան և բնականաբար բոլոր բռնի տեղահանվածների խնդիրները կհասցեագրվեն: Գորիսի կոորդինացիոն կենտրոնը զբաղվում է կեցություն տրամադրելու հարցերով, սակայն քաղաքացիներին օթևան տրամադրելու աշխարհագրությունը չի սահմանափակվելու միայն Սյունիքի մարզով: Իսկ ինչ վերաբերում է Կոռնիձորի հատվածում տեղակայված հումանիտար բեռով լի ավտոշարասյանը, ապա որոշում է կայացվել ավտոշարասյունը տեղափոխել Գորիս, որպեսզի հնարավոր լինի մարդասիրական ուղեբեռը տեղափոխել Լեռնային Ղարաբաղ ՌԴ խաղաղապահ զորախմբի ներկայացուցիչների և ԿԽՄԿ-ի աշխատակիցների միջոցով»,-նշեց Սարգսյանը:
Վրանային կայանում աշխատող ՀՀ ՆԳՆ միգրացիայի և քաղաքացիության ծառայության աշխատակիցներին օգնում են նաև Կարմիր խաչի ներկայացուցիչներն ու բազմաթիվ կամավորները: Չափազանց կարևորվում է հատկապես բուժաշխատողների աշխատանքը:
Խնձորեսկի առողջության առաջնային պահպանման կենտրոնի բժիշկ Աշոտ Թելունցն «Արմենպրես»-ի հետ զրույցում նշեց, որ իրենք Լեռնային Ղարաբաղից բռնի տեղահանվածներին Կոռնիձորում Կարմիր Խաչի աշխատակիցների հետ ցուցաբերում են առաջնային բուժօգնություն:
«Թեև օրվա ընթացքում լինում են պահեր, երբ մարդկանց հոսքը մեծանում է, սակայն մեզ հաջողվում է սպասարկել և բուժօգնություն սուցաբերել բոլորին: Մարդիկ հիմնականում բողոքում են զարկերակային հիպերտենզիայից, բարձր ճնշումից, գլխացավից, սրտխառնոցից: Եթե ախտորոշվում է ծանր վիճակ, նրանց անմիջապես շտապօգնության մեքենաներով տեղափոխում են Գորիսի հիվանդանոց: Մինչ այս պահը ժամանողների մեջ բարեբախտաբար ծանր վիճակով հիվանդները շատ չեն: Առողջական խնդիրներ ունեն հիմնականում տարեցները և նրանք, ում մոտ հասկանալի պատճառներով սրվել են սիրտանոթային հիվանդությունները»,- ասաց Թելունցը:
Նա տեղեկացրեց, որ բժիշկները Կոռնիձոորի վրանային կայանում աշատում են 24-ժամյա ռեժիմով, հետո նրանց փոխարինում են գործընկերներն այլ բնակավայրերի բուժհաստատություններից: Հերթափոխը տեղի է ունենում առավոտյան ժամը 09:00-ին: Բռնի տեղահանվածների հետ Կոռնիձորում մասնագիտական աջակցություն են ցուցաբերում նաև Կարմիր խաչի հոգեբանները՝ հաշվի առնելով, որ մեր հայրենակիցներից շատերը գտնվում են հոգեբանական ծանր վիճակում: Լեռնային Ղարաբաղից ժամանողներից շատերին դիմավորում են նաև Հայաստանում բնակվող բարեկամները, որոնք մեքենաներով սպասում են վրանային կայանի հարևանությամբ: Մարդականց օգնելու համար ստեղծված են առաջնային անհրաժեշտ բոլոր պայմանները:
