ՀԱՊԿ-ը պահպանում է բոլոր պարտավորությունները Հայաստանի հանդեպ, երկիրը մնում է կազմակերպության անդամ՝ հայտարարել է ՀԱՊԿ-ի գլխավոր քարտուղար Իմանգալի Տասմագամբետովը։
«Հայաստանը եղել է և շարունակում է լինել մեր դաշնակիցը ՀԱՊԿ-ում, և Հայաստանի հանդեպ մեր բոլոր պարտավորությունները պահպանվում են։ Իսկ կազմակերպությանը անդամակցության հարցը երկրի ինքնիշխան իրավունքն ու որոշումն է»,- ասել է նա կազմակերպության արտաքին գործերի նախարարների խորհրդի հանդիպման շրջանակում։
Տասմագամբետովը նաև հույս է հայտնել, որ Երևանը «կպարզաբանի իրավիճակը» ՀԱՊԿ-ին անդամակցության վերաբերյալ և որոշում կկայացնի՝ լինել կազմակերպության կազմում, թե ոչ:
ՀԱՊԿ արտաքին գործերի նախարարների խորհրդի նիստում կազմակերպության կազմից Հայաստանի դուրս գալու ընթացակարգ չի քննարկվել. Երևանից համապատասխան հարցում չի ստացվել: Այդ մասին հայտարարել է Ռուսաստանի արտգործնախարար Սերգեյ Լավրովը՝ ՀԱՊԿ ԱԳ նախարարների խորհրդի նիստից հետո։
Պատասխանելով ՀԱՊԿ-ից Հայաստանի դուրս գալու հնարավոր հետևանքների մասին լրագրողի հարցին՝ Լավրովը նշել է. «Գուշակելը դիվանագիտական ավանդույթ չէ։ Այո, այսօր ՀՀ նախարարը ներկա չի եղել նիստին, բայց Հայաստանից որևէ փաստաթուղթ, որևէ պաշտոնական քայլ չի եղել, որն անհրաժեշտ կդարձներ քննարկել տեղի ունեցածի հետևանքները»:
