ԵՄ-ն ավելացնում է Հայաստանում իր դիտորդների թիվը, ինչն Ադրբեջանում դժգոհություններ է առաջացնում. լրագրողի այս դիտարկմանն ի պատասխան՝ ԱԺ ՔՊ խմբակցության պատգամավոր Վաղարշակ Հակոբյանն ասաց.
«Ես դժգոհությունների մասին չգիտեմ, բայց առաջարկում եմ մեզ կենտրոնանալ պրոցեսի վրա, որը տեղի է ունենում: Ես կարծում եմ՝ դիտորդները Հայաստանի Հանրապետություն եկել են բավականին բարդ իրավիճակում և բավականին պատասխանատու ժամանակահատվածում, և մենք շատ դրական ենք գնահատում այդ քայլը. սա նաև այդ պրոցեսի շարունակությունն է»:
Արձագանքելով այն հարցին, թե դիտորդների թվի ավելացումը որքանով կամրապնդի Հայաստանի անվտանգային վիճակը՝ Վաղարշակ Հակոբյանը նշեց. «Հայաստանի անվտանգային իրավիճակը կամրապնդի խաղաղության պայմանագրի ստորագրումը, որը մենք նախաձեռնել ենք և այդ ուղղությամբ շարժվում ենք»:
Հիշեցնենք՝ ԵՄ արտաքին հարաբերությունների և անվտանգության քաղաքականության բարձր ներկայացուցիչ Ժոզեպ Բորելը հայտարարել էր, որ Արտաքին հարաբերությունների հանձնաժողովն այսօր համաձայնել է ուժեղացնել Հայաստանում ԵՄ քաղաքացիական առաքելությունը և ընդլայնել դրա կազմը` 138-ից հասցնելով 209-ի: