Արցախի ԱԺ նախկին պատգամավոր, «Միացյալ Հայաստան» կուսակցության նախագահ Վահան Բադասյանը ձերբակալվել է, միջնորդություն է ներկայացվել դատարան՝ նրան կալանավորելու համար: Այդ մասին մի շարք ԶԼՄ-ների հարցին ի պատասխան՝ հայտնեցին ԱԱԾ մամուլի կենտրոնից: Հարցին, թե ի՞նչ գործի շրջանակներում է ազատամարտիկը ձերբակալվել, ԱԱԾ-ից չպատասխանեցին:
Հիշեցնենք՝ Վահան Բադասյանը երեկ «Եռաբլուր» պանթեոնում հայտարարել էր՝ սկսելու է կազմակերպել ՀՀ վարչապետ Նիկոլ Փաշինյանին զենքով ֆիզիկապես վերացնելու գործընթաց:
Ազգային անվտանգության ծառայությունը (ԱԱԾ) մեղադրանք է առաջադրել Արցախի Ազգային ժողովի նախկին պատգամավոր Վահան Բադասյանին։ Այս մասին «Ազատությանը» հայտնեց վերջինիս պաշտպան Արայիկ Պապիկյանը։ Բադասյանը մեղադրվում է իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչեր հնչեցնելու հատկանիշներով (Քրեական օրենսգրքի 301-րդ հոդված)։ Պապիկյանը տեղեկացրեց, որ իր պաշտպանյալը չի ընդունում մեղադրանքը։