Քաշաթաղի մի խումբ բնակիչներ բողոքի ակցիա իրականացրին ՀՀ կառավարության շենքի դիմաց ` պահանջելով կորցրած գույքի փոխհատուցում: Ակցիայի մասնակիցներից մեկը նշեց, որ ամբողջ գույքը թողել են Քաշաթաղում ու դուրս եկել, հիմա գտնվում են անելանելի վիճակում: Նրա խոսքով` վերջին երկու ժամում են հայտարարել տարհանման մասին, ուստի իրենց հետ ոչինչ չեն վերցրել: «Թող մեզ տուն տրամադրեն, գնանք ապրենք: Մի քանի անգամ օգնություն է տրամադրվել, սակայն դա բավարար չէ ապրելու համար»,- ասաց բողոքի ակցիայի մասնակիցներից մեկը:
Այնուհետև Քաշաթաղի շրջվարչակազմի համայնքների մի քանի ղեկավարներ հանդիպեցին վարչապետի օգնական Սուրեն Ղամբարյանի հետ: Ղամբարյանը հանդիպում է նշանակել փետրվարի 3-ին՝ փոխվարչապետ Մհեր Գրիգորյանի հետ` քննարկելու խնդիրների լուծումները:
Վարչապետի օգնականի հետ հանդիպած բնակիչներից մեկն էլ նշեց, որ Կառավարությունում՝ Մհեր Գրիգորյանի գլխավորությամբ, աշխատանքային խումբ է գործելու։ «Մեր հարցերով զբաղվելու է փոխվարչապետը, չորեքշաբթի կներկայացնենք ձեզ հետաքրքրող բոլոր հարցերը, այդ աշխատանքային խումբը միշտ գործող աշխատանքային խումբ է»։
