«Օլիմպիական խաղերի, աշխարհի և Եվրոպայի առաջնությունների հաղթողներին և մրցանակակիրներին, ինչպես նաև Օլիմպիական  խաղերի, աշխարհի առաջնությունների 4-8-րդ տեղերը  գրաված մարզիկներին և Օլիմպիական խաղերի ծրագրում ընդգրկված մարզաձևերի Հայաստանի Հանրապետության հավաքականների մարզիչներին, բժիշկներին ու մերսողներին սպորտային նպաստ կհատկացվի»,-  երեկ` հունիսի 30-ին կայացած Կառավարության հերթական նիստի չզեկուցվող հարցերի փաթեթում ներառված է նաեւ սույն որոշումը, որի ընդունումը կնպաստի սպորտային նպաստի վճարման ծրագրի շրջանակում ընդգրկված շահառուների  սոցիալական վիճակի բարելավմանը,  ինչն էլ որոշակիորեն կլուծի շահառուների առօրյա խնդիրները՝ վերջիններիս համար դառնալով  բարձր նվաճումների խթան, ապահովելով  բարձր արդյունքների ձեռքբերումը՝ բարձրացնելով Հայաստանի Հանրապետության վարկանիշը համաշխարհային մրցասպարեզներում:   

Ինչպես նշվում է նախագծի հիմնավորման մեջ, ծրագիրը շարունակվելու է մինչև 2024 թվականի Փարիզի օլիմպիական խաղերի ավարտը՝ հիմք ընդունելով «Փարիզ-2024» 33-րդ ամառային օլիմպիական խաղերին Հայաստանի Հանրապետության հավաքականների  նախապատրաստությունը՝ ֆեդերացիաների 2022, 2023 թվականների օրացուցային պլաններով նախատեսված աշխարհի,  Եվրոպայի առաջնություններին  և 2023, 2024 թվականների վարկանիշային  մրցաշարերին Հայաստանի Հանրապետության հավաքականների մասնակցությունը: