Գյումրիում փետրվարի 12-ին մեկնարկել են «ՀՀ վարչապետի գավաթ» սեղանի թենիսի սիրողական մրցաշարի Շիրակի մարզի ընտրական փուլի մրցումները: Մրցումներին մասնակցում են միջոցառման համայնքային փուլերում հաղթող և մրցանակակիր դարձած անձիք։ Ի դեպ, մարզում համայնքային փուլերում ընդհանուր գրանցվել է 117 մասնակից:
Մրցումները անց են կացվում երկու տարիքային խմբերով՝ 18-ից 35 տարեկան կանայք, 18-ից 40 տարեկան տղամարդիկ, 36 և բարձր տարիքի կանայք, 41 և բարձր տարիքի տղամարդիկ:
Մարզային փուլում հաղթող և մրցանակակիր դարձած անձինք իրավունք կստանան Շիրակի մարզը ներկայացնելու 2022 թվականի մարտի 12-13-ը ՀՀ Կոտայքի մարզի Չարենցավան քաղաքում անցկացվելիք հանրապետական եզրափակիչ փուլին։
Ինչպես տեղեկացրեց Շիրակի մարզպետարանի մշակույթի ու սպորտի բաժնի պետ Վաչիկ Վարդանյանը, 2021 թվականին մեկնարկել են «ՀՀ վարչապետի գավաթ» անվանակարգում 4 մարզաձևերի սիրողական մրցաշարեր՝ հեծանվավազք, կրոսավազք, սեղանի թենիս և լող: Հեծանվավազքն ու կորսավազքն անցած տարի արդեն անցկացվել են, իսկ սեղանի թենիսն անց է կացվում այս տարվանից: «Շատ լավ միջոցառումներ են. նախ բոլոր տարիքային խմբերը կարող են մասնակցել, բացի դրանից կա մեծ շահագրգռվածություն, քանի որ եզրափակիչ փուլում հաղթողներին սպասվում են դրամական բավական մեծ պարգևներ»,-նշեց Շիրակի մարզպետարանի պատասխանատուն՝ կարևորելով նաև բնակչության շրջանում առողջ ապրելակերպի ձևավորումը և սպորտով ու ֆիզկուլտուրայով զբաղվելու մատչելիությունը: «Կարևոր է նաև այն, որ այս միջոցառումները կնպաստեն սեղանի թենիս մարզաձևի մասսայականությանն ու զարգացմանը»,-հավելեց Վաչիկ Վարդանյանը:
Միջոցառումը կազմակերպվել է ՀՀ կրթության, գիտության, մշակույթի և սպորտի նախարարության կողմից:
