Մարտի 16-ին Վլադիմիր Վարդանյանի նախագահությամբ կայացել է ԱԺ պետական-իրավական հարցերի մշտական հանձնաժողովի հերթական նիստը:
ՀՀ աշխատանքի եւ սոցիալական հարցերի նախարարի տեղակալ Դավիթ Խաչատրյանը երկրորդ ընթերցմամբ քննարկման է ներկայացրել Կառավարության, ՀՀ ԱԺ պատգամավորներ Վլադիմիր Վարդանյանի, Արթուր Դավթյանի հեղինակած ««Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում փոփոխություններ եւ լրացումներ կատարելու մասին» օրենքի նախագիծը` կից ներկայացված օրենքների նախագծերի փաթեթով:
Հիմնական զեկուցողի տեղեկացմամբ` օրենսդրական փաթեթի վերաբերյալ պատգամավորները ներկայացրել են մի շարք առաջարկներ: Առաջինից երկրորդ ընթերցում ընկած ժամանակահատվածում եղել են քննարկումներ նաեւ շահագրգիռ գերատեսչությունների ներկայացուցիչների հետ, ինչի արդյունքում նախագիծը վերախմբագրվել է:
Նշենք, որ փաթեթի նպատակը դատավորների կենսաթոշակի իրավունքի պայմանների համապատասխանեցումն է ՍԴ որոշմանը, ինչպես նաեւ դատախազների ու քննչական մարմիններում ինքնավար պաշտոն զբաղեցրած անձանց կենսաթոշակային ապահովության միասնական պայմանների սահմանումը:
Հանձնաժողովը դրական եզրակացություն է տվել օրենսդրական փաթեթին:
