Հայաստանն ու երկրի հյուսիսային հատվածի սահմանի մի մասում տեղի ունեցող ռազմական գործողությունները շարունակում են մնալ աշխարհի ուշադրության կենտրոնում: Կրակը սահմանի երկայնքով դեռ չի դադարել, չեն դադարում նաեւ միջազգային արձագանքները ստեղծված իրավիճակին:
Արձագանքել եւ տարատեսակ կոչեր են հնչեցրել միջազգային հեղինակավոր կառույցներ, աշխարհի տարբեր երկրների ազդեցիկ պաշտոնյաներ, պատգամավորներ, կոնգրեսականներ, նրանց մի մասը հանդես է գալիս հայկական կողմի պաշտպանությամբ, մի մասը՝ ադրբեջանական շահերն է պաշտպանել, որոշ արձագանքներում էլ կողմնակալությունը ոչ թե բացահայտ, այլ ծպտված է:
Իտալիա-Հայաստան խորհրդարանական բարեկամական խմբի ղեկավար Մասսիմիլիանո Կապիտանիոն իր համերաշխությունն է հայտնել հայ ժողովրդին: Իտալացի մեկ այլ պատգամավոր՝ Ալեխանդրո Պագանոն, «Թվիթեր»-ի իր միկրոբլոգում հիշատակել է իրենց հավատքի համար 1915թ. Հայոց ցեղասպանության ընթացքում Օսմանյան Թուրքիայի ձեռքով նահատակված 1.5 հայերին, նշելով, որ նույնն այսօր կատարվում է արդեն Ադրբեջանի կողմից: Իտալիայի խորհրդարանի պատգամավորների պալատի անդամ, LEGA NORD կուսակցության ներկայացուցիչ Պաոլո Ֆորմենտինին միացել է Հայաստանին ու հայ ժողովրդին ուղղված համերաշխության արշավին՝ հույս հայտնելով, որ խաղաղությունը կհաղթի բռնությանը: Իտալիայի Պատգամավորների պալատի պատգամավոր, Միջխորհրդարանական Միության Իտալիա-Հայաստան հարաբերությունների բաժնի ղեկավար, Իտալիա-Հայաստան բարեկամական խմբի անդամ Ջուլիո Չենտեմերոն եւս իր համերաշխությունն է հայտնել Հայաստանին և հայ ժողովրդին:
Գվատեմալայի Հանրապետության Կոնգրեսի առաջին փոխնախագահ Ֆելիպե Ալեխոս Լորենզանան, որը դեկտեմբերին այցելել էր Արցախի Հանրապետություն, թվիթերի իր միկրոբլոգում դատապարտել է Հայաստանի դեմ Ադրբեջանի սանձազերծած հարձակումը: ժամեր անց հայտնի դարձավ, որ «Թվիթեր»-ի իր էջում պատգամավոր, Գվատեմալայի ազգային առաջադիմական կուսակցության գլխավոր քարտուղար Մանուել Կոնդե Օրելիանին եւս աջակցում է հայերին ու նշում, որ Գվատեմալայի կոնգրեսի պատգմավորների մեծամասնությունը դատապարտում են հուլիսի 12-ին Ադրբեջանի կողմից ձեռնարկած ռազմական գործողությունները Հայաստանի դեմ, պահանջում են անհապաղ դադարեցնել նախահարձակ և սպառնացող գործողությունները և կոչ են անում երկխոսության միջոցով հասնել խաղաղության:
Հայ-ադրբեջանական սահմանի երկայնքով 3 օր շարունակ չդադարող լարվածությանն արձագանքել են նաեւ Միացյալ նահանգների կոնգրեսականները: Իհարկե, ինչպես եւ սպասվում էր, առաջինն իր աջակցության մասին հայտնեց ԱՄՆ-ի կոնգրեսական, Հայոց ցեղասպանության ճանաչման Կոնգրեսի բանաձեւի համահեղինակ, հայերի լավագույն բարեկամներից Ադամ Շիֆը:
Նա նշել է, որ հայկական դիրքերի ուղղությամբ կրակահերթերն ու ադրբեջանական կողմի գործողությունները վտանգի տակ են դնում զինվորականների եւ խաղաղ բնակչության կյանքը, սրում են հակամարտությունը, որը կարող է ավերիչ ազդեցություն ունենալ տարածաշրջանի համար՝ հատկապես գլոբալ համաճարակի պայմաններում: Ըստ կոնգրեսականի, այդ գործողությունները հարկավոր է դիտարկել Հայաստանի եւ Արցախի նկատմամբ Ադրբեջանի ռազմատենչ հռետորաբանության եւ իր սահմանների երկայնքով միջազգային դիտարկումներից հրաժարվելու համատեքստում:
ԱՄՆ-ի Կոնգրեսի հայկական հարցերի հանձնախմբի համանախագահ Ֆրենք Փելոնին եւս աջակցություն հայտնեց՝ հայտարարելով, որ Ադրբեջանը հերթական անգամ փորձում է պատերազմ սկսել Հայաստանի հետ: Ըստ Փելոնիի, Ադրբեջանի կողմից Հայաստանի ու Արցախի դեմ մշտապես թեժ հռետորաբանություն կիրառելը ևս մեկ կոնֆլիկտ հրահրելու համաձայնեցված փորձերի մաս է: Ամերիկացի սենատոր Էդվարդ Մարքին էլ իր հերթին իր զորակցությունն է հայտնել Հայաստանին և հայ ժողովրդին՝ դատապարտելով Ադրբեջանի՝ կոնֆլիկտ հրահրող սադրիչ գործողությունները: Մարքին հայտարարել է, որ ինքը կանգնած է Հայաստանի կողքին, քանի որ այն պաշտպանում է իր տարածքային աբողջականությունը: Ադրբեջանն ու Թուրքիան, ըստ սենատորի, պետք է հարգեն հայ-ադրբեջանական սահմանը, պետք է հարգեն Լեռնային Ղարաբաղի ժողովրդի ձգտումները եւ անմիջապես վերջ տան ռազմական գործողություններին:
Իսպանիայի Կոնգրեսի պատգամավոր Ջոն Ինիարիտուն, անդրադառնալով հայ-ադրբեջանական սահմանին Ադրբեջանի կողմից սանձազերծված գործողություններին, նշել է, որ բավական է Ադրբեջանը բռնություն ու սադրանք իրականացնի: «Մինչ աշխարհը կոչ է անում երկխոսության և բանակցությունների, Ադրբեջանը նախընտրում է հարձակվել Հայաստանի վրա: Բավ է բռնությանն ու սադրանքին»,- նշել է պատգամավորը:
Կիպրոսի Հանրապետության Ներկայացուցիչների Պալատի պատգամավոր Կոնստանտինոս Էֆտաթյոն էլ է դատապարել Ադրբեջանի հարձակումը Հայաստանի սահմանի վրա, ինչպես նաեւ քաղաքացիական եւ ոչ ռազմական նշանակության օբյեկտների վրա։ Պատգամավորը նշել է, որ իրենց խորհրդարանը խաղաղության, ազատության, կայունության և միջազգային իրավունքի գերակայության կողմնակիցն է:
Ադրբեջանական գործողությունները դատապարտելի են նաեւ Նիդերլանդների խորհրդարանի պատգամավոր, Հայաստան-Նիիդերլանդներ բարեկամության շրաջանակի համանախագահ Ջոել Ֆորդևինդի տեսանկյունից: Նա նշել է, որ Ադրբեջանն է ռազմական գործողությունների նախահարձակ եղել ու կոչ է արել ՄԱԿ-ին ու ԵԱՀԿ-ին՝ միջնորդել և վերականգնել խաղաղությունը Ադրբեջանի և Հայաստանի միջև:
Հայ-ադրբեջանական սրված հակամարտության այս օրերի իրադարձություններին արձագանքել են ՀԱՊԿ-ը, ՄԱԿ-ը, ԵԱՀԿ-ն, Կարմիր խաչի ՄԿ-ն, ԱՄՆ-ի պետդեպարտամենտը, մի քանի տասնյակ պետությունների Արտաքին գործերի նախարարություններ եւ նախարարներ:
Աղբյուր՝ Հայկական Ժամանակ