Ինչպես ամեն տարի, այս տարի ևս Տիգրան Պետրոսյանի անվան շախմատի տունն իր հարկի տակ էր ընդունել փրկարար շախմատիստներին:
Հունիսի 28-ին անցկացվել է Արտակարգ իրավիճակների նախարարության փրկարար ծառայության կառուցվածքային և տարածքային ստորաբաժանումների շախմատի ամենամյա առաջնությունը: Այն կազմակերպել է ԱԻՆ ՓԾ փրկարար ուժերի վարչությունը: Մինչ մրցաշարի եզրափակիչ փուլը, կառուցվածքային և տարածքային ստորաբաժանումներում կազմակերպվել և անցկացվել է նախընտրական մրցումներ, որի արդյունքում եզրափակիչ փուլ են անցել թվով 12 մասնակից:
Շախմատի առաջնության անցկացման մրցավարն էր շախմատի միջազգային կարգի մրցավար Սամվել Վարդանյանը: Միավորների հաշվարկից և մրցաշարի ամփոփումից հետո առաջին, երկրորդ և երրորդ տեղերը համապատասխանաբար զբաղեցրել են՝ ՓԾ ԾԿՎ կապի, ազդարարման համակարգերի և տեխնիկական ապահովման բաժնի գլխավոր մասնագետ Մելքոն Եսայանը, ՃԿՊԱ ՊՈԱԿ-ի պրոռեկտոր, փ/ծ գնդապետ Սարգիս Կյուրեղյանը և ԱԻՆ ՓՈՒՎ ՀՓԱԿ բաժնի ավագ հրահանգիչ, փ/ծ մայոր Վլադիմիր Պետրոսյանը: Հաղթողները պարգևատրվել են պատվոգրերով:
Առաջնության ավարտին Փրկարարական ուժերի վարչության հրշեջ-փրկարարական պատրաստության բաժնի պետ Գարեգին Սաֆարյանը շնորհակալագրեր է հանձնել Սամվել Վարդանյանին, շախմատի միջազգային կարգի մրցավար Նունե Վարդանյանին և Շախմատի տան տնօրեն Հրաչյա Թավադյանին: Բաժնի պետը շնորհակալություն է հայտնել շախմատի տան ողջ անձնակազմին մրցումներն անցկացնելու համար:
