ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը հունիսի 28-ին հանդիպել է Հայաստանում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջոն Գալագերի, Վրաստանում և Հայաստանում Միացյալ Թագավորության պաշտպանության հարցերով հատուկ խորհրդական Քլեր Մաքյանի, աուդիտի հարցերով փորձագետ Ջոն Չեշայրի հետ:

Անդրանիկ Քոչարյանը, ողջունելով հյուրերին խորհրդարանում, նշել է, որ նախորդ հանդիպումը 3 տարի առաջ է եղել:  «Covid-19-ի, ապա նաև 44-օրյա պատերազմի հետևանքով շատ ծրագրեր, այդ թվում` այն պայմանավորվածությունները, որոնք ձեռք էին բերվել նախորդ հանդիպմանը, կիսատ են մնացել, սակայն, հետպատերազմական շրջանում խաղաղության օրակարգը պետք է դարձնել առաջնահերթություն»,- ընդգծել է հանձնաժողովի նախագահը:

Անդրանիկ Քոչարյանը կարևորել է միջազգային գործընկերների հետ անվտանգային հարցերի շուրջ համագործակցությունը` այս համատեքստում առանձնացնելով DCAF-ին, որի աջակցությամբ դեռևս ապրիլ ամսին ՀՀ Ազգային ժողովի և կառավարության բարձրաստիճան ներկայացուցիչներից բաղկացած պատվիրակությունն ուսումնական այց է կատարել Շվեյցարիայի Համադաշնություն:

Հանձնաժողովի նախագահն առանձնահատուկ շեշտել է Հայաստանի և Միացյալ Թագավորության միջև համագործակցությունը ռազմական կրթության ոլորտում եւս: Անդրանիկ Քոչարյանը կարևոր է համարել Հայաստանում զինված ուժերի բարեփոխումների իրականացման ճանապարհին Միացյալ Թագավորության հաջողված փորձի ուսումնասիրումը և կիրառումը` հատկապես նոր ձևավորվելիք արտաքին հետախուզական և հատուկ ծառայությունների գործունեության շրջանակում:

Դեսպան Ջոն Գալագերը, շնորհակալություն հայտնելով հանդիպման համար, նշել է, որ Հայաստանն ու Միացյալ Թագավորությունը պաշտպանության բնագավառում համագործակցությունն ընդլայնելու մեծ հնարավորություններ ունեն:

Քլեր Մաքյանն իր հերթին ներկայացրել է Պաշտպանության ներքին աուդիտի ու ռիսկի կառավարման բնագավառում ՀՀ ՊՆ-ի, ինչպես նաև ՀՀ ԱԺ պաշտպանության և անվտանգության հարցերի մշտական հանձնաժողովի հետ համագործակցության հնարավորությունները: Անդրանիկ Քոչարյանը կարևորել է այս բնագավառում համագործակցությունը ու վստահեցրել, որ այն կլինի իր անմիջական ուշադրության ներքո:

Կողմերը վստահեցրել են, որ հանդիպումները կլինեն շարունակական: