«Հայաստան» համահայկական հիմնադրամը իրականացնում է սոցիալական աջակցության մի շարք ծրագրեր: Ինչպես տեղեկացավ InterLur.com լրատվական գործակալությունը «Հայաստան» համահայկական հիմնադրամից, սեպտեմբերի 22-ին հանդիսավոր կերպով բացվել է «Երջանկության ճանապարհ» հաշմանդամություն ունեցող անձանց ցերեկային խնամքի կենտրոնը, որն իրականություն է դարձել Հիմնադրամի ամերիկահայ բարերարներ Արևիկ և Արամայիս Մաթևոսյանների նախաձեռնությամբ և ֆինանսավորմամբ, ինչպես նաև Հիմնադրամի և «Երջանկության ճանապարհ» ՀԿ-ի համատեղ ջանքերով:
Մինչ ուսումնական տարվա մեկնարկը շենքում և հարակից տարածքում իրականացված բարեփոխումները նոր շունչ են պարգևել կենտրոնին՝ բարենպաստ պայմաններ ստեղծելով շահառուների առօրյան հաճելի միջավայրում կազմակերպելու համար: Ցերեկային կենտրոնի շահառուներին տրամադրվելու է օրական երեքանգամյա սնունդ, ինչպես նաև ապահովվելու է տնից-կենտրոն և կենտրոնից տուն տեղափոխումը հարմարեցված տրանսպորտային միջոցով։
Ծրագրի նպատակն է իրականացնել ցերեկային կենտրոնի անխափան գործունեությունը՝ բազմաֆունկցիոնալ մասնագիտական թիմի ներգրավմամբ, ապահովելով 20-25 շահառուների ցերեկային խնամքն ու առօրյա զբաղվածությունը, ներառյալ ֆիզիկական, ստեղծագործական և մտավոր ներուժի զարգացում, սոցիալական ինտեգրում։
Այսպիսով, մտավոր խնդիրներ ունեցող անձինք հնարավորություն կունենան լիարժեքորեն և հավասարապես օգտվելու մարդու իրավունքներից և հիմնարար ազատություններից»,- ասված է հաղորդագրության մեջ։