Գյումրիի հրաձգության մանկապատանեկան մարզադպրոցի սաները կմասնակցեն Նորվեգիայում կայանալիք «վազող թիրախ» եւ «խառը վազք» մրցաձեւերի՝ մինչեւ 21 տարեկանների Եվրոպայի առաջնությանը: Հայաստանի հրաձգության մեծահասակների առաջնությանը մասնակցած գյումրեցի 8 մարզիկներից 6-ը վերադարձել են մեդալներով։
Արդյունքում, մարզադպրոցի 3 մարզիկները՝ Գոռ Խաչատրյանը, Հովհաննես Մարգարյանը և Արուսյակ Գրիգորյան, ընդգրկվելով հավաքականի կազմում՝ կմասնակցեն մարտի 22-ին Նորվեգիայում կայանալիք Եվրոպայի առաջնությանը:
««Վազող թիրախում» Հայաստանի հավաքականի հիմնական կորիզը մեր երեխաներն են: Մենք մեծ հույսեր ունենք, որ Նորվեգիայից էլ մեր մարզիկներն առանց մեդալների չեն գա, չնայած երկու տարի է՝ համավարակի պատճառով մեր մարզիկները միջազգային մրցույթների չեն մասնակցում»,-«Արմենպրես»-ի հետ զրույցի ժամանակ նշեց Գյումրիի «Հրաձգության մանկապատանեկան մարզադպրոց»-ի մարզիչ Էդվարդ Ղարիբյանը, հավելելով՝ լավ պայմաններ ունենալու դեպքում ավելի շատ լավ մարզիկներ կունենան:
Եվրոպայի ու Հայաստանի չեմպիոն ու ռեկորդակիր, միջազգային կարգի սպորտի վարպետ 17-ամյա Գոռ Խաչատրյանը նշում է՝ դժվար է թղթե թիրախի վրա պարապելուց հետո միջազգային մրցույթներում մրցել համակարգչային թիրախների վրա:
Գյումրեցի հրաձիգները փորձում են անել ամեն ինչ, որ ոչ միայն Նորվեգիայում կայանալիք, այլ նաև՝ հետագա մյուս մրցույթներին լավ հանդես գան ու բարձր պահեն Գյումրիի բարի ավանդույթները:
Շիրակի մարզպետարանի ու Գյումրու քաղաքապետարանի համապատասխան կառույցներն էլ նշում են՝ կա առաջարկ՝ հրաձգարանը տեղափոխել Արթուր Ալեքսանյանի անվան նոր կառուցվող մարզադպրոցի տարածք: Այդ հարցով քաղաքապետարանն արդեն դիմել է ՀՀ քաղաքաշինության կոմիտե ու ԿԳՄՍ նախարարություն: Վերջնական պատասխանին դեռ սպասում են: