Ժամը 22։00-ի դրությամբ ՀՀ տարածքում ավերածությունների, զոհերի, տուժածների վերաբերյալ ահազանգեր չեն գրանցվել. տեղեկացնում է ՀՀ ԱԻՆ-ը: Ժամեր առաջ Հայաստանի Շորժա գյուղից 5կմ հյուսիս-արևելք տեղի ունեցած երկրաշարժի հետեւանքով առաջացած խուճապն անցել է, էլեկտրաէներգիան վերականգնվել: Այս մասին «Հայկական ժամանակ»ի հետ զրույցում ասաց համայնքի ղեկավար Սուլիկո Շուշանյանը: Ըստ համայնքապետի, այս պահի դրությամբ Շորժա խոշորացված համայնքի որևէ բնակավայրում զոհեր կամ վիրավորներ չկան:
«Վիրավորներ, զոհեր չկան, հոսանք կա, գազը կա, ջուրը կա: Ժողովուրդն էլ կամաց-կամաց տներն են մտնում, որովհետև արդեն հետցնցումներն անցան: Երկրաշարժը բավական ուժեղ էր, հոսանքն էլ որ անջատվեց, ու մի 40 րոպե տևեց, մարդիկ խուճապի մատնվեցին: Ժողովուրդը միանգամից անակնկալի եկավ: Հետո, որ հոսնաքը տվեցին, հանդարտվեցին»,-տեղեկացրեց համայնքապետը:
Շորժայում նաև մեծ ավերածություններ չկան: Սուլիոկ Շուշանյանն ասաց՝ փոքրիկ ճաքեր, մասնակի խնդիրներ եղել են, բայց խոշոր ավերածություններ ոչ մի համայնքում չի գրանցվել:
«Դպրոցները կանգուն են: Տներն էլ մթության մեջ ինչքան հնարավոր է ուսումնասիրել ենք, ավերված չեն: Որոշ համայնքներում հին գոմեր, բաներ կան, դրանք են վնասվել, բայց մեծ խնդիրներ չեն դրանք: Հենց նոր էլ ինֆորմացիան ստացվեց Ջիլ գյուղից: Այնտեղ ևս ավերածություններ չկան, վթարային դպրոցը կանգուն է, տներում թեթեև ճաքեր կան: Վարչական ղեկավարը պտտվում է տնետուն: Խնդիրնեը մասնակի են»,-ասաց Շորժայի համայնքապետը: